जिल्ला प्रहरी कार्यालय बाँकेले नेपालगन्जको राँझा बिमानस्थलबाट ४ किलो सुनसहित २ जनालाई पक्राउ गरेपछि रात नपर्दै सबै संचारकर्मीहरुलाई पत्रकार सम्मेलनमा बोलायो । ४ किलो सुन बरामद भएको कुरा आगो जसरी फैलियो । तर घटनाले अहिले नयाँँ मोड लिएको छ । सुनसहित पक्राउ परेकाहरुसंग सुन किनेको बिल भरपाई पनि भेटियो । अब भने जिल्ला प्रहरी कार्यालय बाँकेले सुन किनेको बिल भर्पाइ सक्कली हो या नक्कली भन्ने कुराको अनुसन्धान सुरु गरेको बताएको छ ।
बुद्ध ज्वेलरी वर्कशप प्राली मैतिदेवी काठमाडौँले सुन बिक्री गर्दा दिएको बिल
"बिल सक्कली नक्कली पुष्टि भएको छैन"
शुक्रबार साँझ बाँके प्रहरीले ४ किलो सुन सहित २ जनालाई पक्राउ गरेर सार्वजनिक गरेको छ । विशेष सुचनाको आधारमा ४ किलो सुन सहित श्री एयरलाइन्सबाट नेपालगन्ज आएका झापा खादुनावारी गा.बि.स वडा नं. ६ बस्ने अमिर लगुन विश्वकर्मा र जिल्ला मोरङ लेटाङ गा.वि.स.वडा नं २ बस्ने २८ वर्षिय बुद्धिमान खातीलाई जिल्ला प्रहरी कार्यालयबाट खटिएको प्रहरी टोलीले पक्राउ गरेको कार्यालयका प्रमुख प्रहरी उपरीक्षक श्यामकृष्ण अधिकारीले बताउनुभयो ।
बिल भर्पाइ भेटिएको थियो भने किन हतारमा पत्रकार सम्मेलन गरियो त ? उनिहरुको सुक्ष्म अनुसन्धान गरेर मात्र सबै तथ्यहरु सहित मिडियामा ल्याउनु पर्थ्यो नि । अब के होला ? भन्ने नेपाल कागजको प्रश्नमा उपरीक्षक अधिकारी यस्तो भन्नुहुन्छ -
होइन प्रहरीले विशेष सुचनाको आधारमा ४ किलो सुन सहित २ जनालाई पक्राउ गरेर सार्वजनिक गरेको हो । हो उनिहरुसंग बिल लगायतका कागजातहरु भेटिएका छन । ति कागजातहरु नक्कली हुन या सक्कली भन्ने कुराको अनुसन्धान भैरहेको छ । अर्को कुरा ४ किलो सुन भनेको सानो परिमाण होइन यो निकै ठुलो परिमाण हो । उनिहरुले यो सुन जुत्तामा लुकाएर ल्याएका छन । यत्तिका तथ्यहरु भेटिएपछि प्रहरीले अनुसन्धान गर्नुपरेन? अब हामीले आजै उनिहरुलाई राजस्व अनुसन्धान कार्यालय बाँकेमा बुझाउँदै छौँ । राजस्व अनुसन्धान कार्यालयलेपनी आफ्नो अनुसन्धान गर्छ । हामी छिट्टै तथ्य सार्वजनिक गर्छौँ ।
शुक्रबार गरिएको पत्रकार सम्मेलनमा प्रहरी उपरीक्षक श्यामकृष्ण अधिकारी
काठमाडौँबाट बिमानमा सवार भएर झापा खादुनावारी बस्ने अमिर लगुन विश्वकर्मा र जिल्ला मोरङ लेटाङ बस्ने २८ वर्षिय बुद्धिमान खाती ४ किलो सुन लिएर नेपालगन्ज पुगे तर यो घटनाले काठमाडौँको एयरपोर्टको सुरक्षा फितलो छ भन्ने देखाएको छ । बाँके प्रहरीले ठुलो परिमाणमा सुन पक्राउ गरेपछि काठमाडौँ एयरपोर्टबाट ४ किलो सुन कसरी छिर्यो भन्ने प्रश्न उब्जेको छ ?
बाँके प्रहरीले पाएको सफलतामा काठमाडौँ बिमानस्थलमा रहेको सुरक्षा तामझाम र सुरक्षा निकायको असफलता झल्किएको छ । तर विचारणिय पक्ष यो पनी छ कि करीब ४ किलो जती सुनको कागजात भेटिएको छ । कतै काठमाडौँ विमानस्थलको सुरक्षा हेर्ने प्रहरीले कागजात हेरेरै सुन लान दिएको हो कि भन्ने प्रश्न पनी उठ्छ तर बाँके प्रहरीले जुत्तामा लुकाएर ल्याएको दाबी गरेको छ । यदी सुनको बिल थियो र कानुनबाट बर्जित थिएन भने जुत्तामा किन लुकाइयो भन्ने प्रश्न पनी उठेको छ ।
त्यस्तै मिडियालाई प्राप्त कागजहरुमा प्यानमा कारोबार भएको देखिएको छ । करोडौँको कारोबार भ्याटमा हुनुपर्नेमा प्यानमा कसरी कारोबार भयो भन्ने जस्ता धेरै प्रश्नहरु अनुत्तरितनै छन । यो घटना जती सरल देखिन्छ त्यो भन्दा रहस्यमयी छ । सम्पत्ती शुद्धिकरण र राजस्व अनुसन्धान कार्यालयले गहन अनुसन्धान गर्नुपर्ने देखिन्छ ।
काँचो सुन (६ थान बिस्कुट) ३ किलो ९९४ ग्राम सहित बाँके प्रहरीले सुन जस्तो देखिने १ थान तिलहरी, १ थान बाला, गणेश लकेट ५ थानको (तौल २७.४९ ग्राम ) बरामद् गरेको जनाएको छ । सुन जस्तो देखिनेलाई पनी जोड्दा जम्मा ४ किलो २१.४९ ग्राम सुन बरामद् भएको छ ।
यस्तै सुन चाँदी व्यवसायी संघ बाँकेका अध्यक्ष सलाउद्दिन जसगडले बिल भर्पाइ हेर्दा कानुन सम्मत रुपमा सुन आएको देखिने तर बिल सक्कली हो या नक्कली त्यो भने प्रहरीले बुझ्नुपर्ने बताउनुभयो । उहाँले प्रहरीले बरामद् गरेको सुन बिलमा देखिए अनुसार काँचो सुन (६ थान बिस्कुट) ३ किलो ९ सय ९३ ग्राम भन्दा अलिक बढी रहेको र यस्को शुक्रबारको मुल्य निर्धारण गर्दा ३ करोड १३ लाख ९७ हजार ६ सय ७५ रुपैया बराबर आउने जानकारी दिनुभयो ।
उहाँले प्रहरीले बरामद् गरेको सुन बिक्री बुद्ध ज्वेलरी वर्कशप मैतिदेवी काठमाडौँले गरेको देखिएको बताउनुभयो । जसगडले प्रहरीले बरामद् गरेको सुन व्यापारीहरुले कानुन सम्मत ढंगले मगाएको हुन सक्ने बताउनुभयो । उहाँले भन्नुभयो, " बिललाई मान्नेहो भने अवैध सुन होइन, प्रहरीले पहिला बिलको राम्ररी अनुसन्धान गर्नुपर्छ ।"
सुन त्यसरी व्यक्तिले ल्याउन पाउँछ त ? भनेर प्रश्न गर्दा उहाँले भन्नु भयो, "राष्ट्र बैंकले सबै व्यापारीहरुलाई बोलाएर काठमाडौँमा सुन दिने गर्दछ, हामीले भनिरहेका छौँ कि सुन व्यवसायिहरुको पसल फर्म सम्म ल्याइदिने गर्नु पर्यो । अहिले दसैं तिहार आउँदै छ बजारमा सुनको आवश्यकता छ त्यसैलेपनी व्यापारीले सुन किन्ने बेला भयो । बिल अनुसार सुन वैध छ ।"
यस् बिषयमा बाँके प्रहरी र राजस्व अनुसन्धान कार्यालयले अनुसन्धान अघी बढाएको प्रहरीले बताएको छ । घटनालाई सुक्ष्म अनुसन्धान गरेपछि सबै सत्य-तथ्य बाहिर आउने प्रहरीले बताएको छ । अब प्रश्न उठ्छ सुन वैध हो या अवैध यो भने केही दिनमै थाहा हुने प्रहरी स्रोतले बताएको छ ।
अन्तत: कतै बाँके प्रहरीले चाहिने भन्दा धेरै हतार त गरेको होइन ? पहिला भेटिएका कागजात सक्कली हो या नक्कली भन्ने पत्ता लगाएर मात्र घटनाको निचोड निकालेको भए अनुसन्धानको प्रभावकारीताको पक्ष बलियो देखिन्थ्यो । जिल्ला प्रहरी कार्यालय बाँकेले तत्कालिन समयमै काठमाडौँ प्रहरीसंग समन्वय गरेर कागजातको वास्तविकता बुझ्न सक्थ्यो तर प्रहरीले हतार गर्दा वास्तविकता हल्का रुपमा प्रस्फुटित भएको छ । अब कागजात सक्कली हो या नक्कली प्रहरीले छिट्टै सार्वजनिक गरेर भ्रम चिर्नुपर्ने देखिन्छ ।
