बर्दिया : बर्दियामा साना किसान गोठ तथा दुधजन्य पदार्थ उत्पादन उप-आयोजनाको प्रथम सार्वजनिक सुनुवाई कार्यक्रम सम्पन्न गरिएको छ।
बर्दिया जिल्लाको मधुवन नगरपालिका वडा नम्बर ४ ढोढरीमा उत्पादनमुलक गठबन्धनमा आधारित पुरक अनुदान सहयोग प्राप्त दुध उत्पादनको लागि गाई भैसी पालन तथा गोठ सुधार उप-आयोजनाको प्रथम सार्वजनिक सुनुवाई सम्पन्न भएको हो।
उक्त उप- आयोजनाबाट साना किसान कृषि सहकारी संस्था लि. ढोढरीका १७ जना सदस्य किसान प्रत्यक्ष लाभान्वित हुनेछन् । उप-आयोजनाको स्वीकृत कुल बजेट रुपैयाँ १ करोड ८३ लाख ९ हजार ७ सय ७८, उप-आयोजनाबाट अनुदान रुपैयाँ ९१ लाख ५४ हजार ८ सय ८९ र वित्तीय संस्था मार्फत ऋण रुपैयाँ ९१ लाख ५४ हजार ८ सय ८८ रहनेछ।
दुध उत्पादन तथा उत्पादकत्व वृद्धि गर्ने, स्वरोजगार सिर्जना गर्ने, उत्पादित दुधको उचित बजार ब्यवस्थापन गर्ने, शेयर सदस्यहरुको आयस्तरमा वृद्धि गर्ने र साना किसानलाई व्यवसायीक बनाउने लगायतको उद्देश्य उप-आयोजनाको रहेको छ।
नेपाल लाइभस्टक सेन्टर इनोभेसन आयोजना (NLSIP) को सहयोग र साना किसान कृषि सहकारी संस्था लि. (SFACL) को ढोढरी आयोजनामा कार्यक्रम सम्पन्न गरिएको हो।उप-आयोजनाको २०७८ साल ६ महिना ५ गते सम्झौता भई २०७९ साल ७ महिना ३० गतेसम्म कार्यक्रम सम्पन्न हुने छ।
उक्त प्रथम सार्वजनिक सुनुवाई कार्यक्रममा प्रमुख अतिथिको रूपमा मधुवन नगरपालिका नगर उप-प्रमुख शुवरानी थारु रह्नुभएको थियो। त्यस्तै, अतिथिका रूपमा मधुवन नगरपालिका पशु सेवा शाखा प्रतिनिधि, मधुवन नगरपालिका वडा नं.-४ वडा कार्यालयका प्रतिनिधि, नेपाल लाइभस्टक सेन्टर इनोभेसन आयोजनाका प्रतिनिधि, ईलाका प्रहरी कार्यालय ढोढरीका प्रतिनिधि र साना किसान कृषि सहकारी संस्था लि. ढोढरीका कार्यसमिति पदाधिकारीहरु रहनुभएको थियो।
प्रथम सार्वजनिक सुनुवाई कार्यक्रममा बोल्दै नेपाल लाइभस्टक सेक्टर इनोभेसन आयोजना प्रतिनिधि अरुण कुवंरले संचालन गर्न लागेको उप-आयोजना समयमा नै सहि ढङ्गले सम्पन्न गरि यस कार्यक्रमको लाभ लिन अनुरोध गर्नुभएको छ।
त्यस्तै, प्रमुख अतिथि मधुवन नगरपालिका नगर उप-प्रमुख शुवरानी थारुले किसानलाई दाताहरुबाट सम्पुर्ण अनुदान स्वरुप नदिएर किसानले पनि स्वलगानीमा कार्यक्रम संचालन भएकोमा खुशी ब्यक्त गर्नुभएको छ। साथै, सम्पुर्ण अनुदान भएपछि कार्यक्रम सफल नहुन पनि सक्छ भन्ने उहाँको भनाइ थियो।
प्रथम सार्वजनिक सुनुवाई कार्यक्रम साना किसान कृषि सहकारी संस्था लिमिटेडको आयोजनामा सम्पन्न भएको थियो । त्यस्तै, उप-आयोजना प्रतिबेदन प्रस्तुति उप-आयोजनाका ब्यवस्थापक सुमन पाण्डे गर्नुभएको हो । कार्यक्रमको सन्चालन साना किसान कृषि सहकारी संस्था लिमिटेड ढोढरीका प्रबन्धक भावना घर्तीले गर्नुभएको थियो।
