बर्दिया : बर्दिया जिल्लाको मधुवन नगरपालिका वडा नंवर ३ मा नेपाली कांग्रेसको शनिबार २७ गते हुन गैरहेको अधिवेशन होला या नहोला भन्ने अन्यौलता कार्यकर्ताहरुमा छाएको छ । यसअघि असोज ५ गते मंगलबार बिबादका कारण यहाँँको वडा अधिवेशन स्थगित भएको थियो ।
नेपाली कांग्रेस केन्द्रीय निर्वाचन समितिले प्रकाशित गरेको नामावली अनुसार चुनाव हुनगईरहेको अवस्थामा नयाँँ नामावली दोस्रो पक्षले सार्वजनिक गरेपछि बिबाद भएको थियो । बिबाद पछि यहाँको निर्वाचन स्थगित भएको थियो । सो बिबाद अँझै सम्म कायमै रहेकोले फेरि तोकिएको समयमा अधिवेशन हुन्छ वा हुन्न भन्नेमा यहाँका नेता-कार्यकर्ताहरुमा चासो तथा अन्यौलता छाएको छ ।
मुख्यतः बर्दियाको मधुवन नगरपालिकावडा नं-३ मा नेपाली कांग्रेसका जिल्ला सभापति/ संघिय सांसद सन्जय गौतम र केन्द्रिय सदस्य/संघिय सांसद किशोर सिंह राठौर पक्षधर बिच तिब्र प्रतिस्पर्धा रहेको छ । जिल्ला सभापति/ संघिय सांसद सन्जय गौतम कांग्रेसका वरिष्ठ नेता राम चन्द्र पौडेल निकट मानिनुहुन्छ भने केन्द्रिय सदस्य/संघिय सांसद किशोर सिंह राठौर कांग्रेस सभापति तथा वर्तमान प्रधानमन्त्री शेरबहादुर देउबा निकट मानिनुहुन्छ । दुबै नेताको ‘ग्रास रुट लेबल’ तल्लो तह सम्मका कार्यकर्ताहरुसंग पहुँच रहेको छ । दुबै नेता नेपाली कांग्रेस बर्दियाका पुराना कार्यकर्ता हुनुहुन्छ ।
जिल्ला सभापती गौतम पक्ष नेपाली कांग्रेस केन्द्रीय निर्वाचन समितिले प्रकाशित गरेको नामावली अनुसार चुनाव हुनु पर्ने अडानमा छन भने केन्द्रिय सदस्य राठौर पक्षले ३० जना नाम समावेश गरेर हुनुपर्ने अडानमा छन ।
कार्तिक २७ गते शनिबार पुन हुन गइरहेको निर्वाचनका बारेमा यहाँका नेता कार्यकर्ताहरुको धारणा लिएका छौँ ।
नेर्प सिंह ठकुरी
क्रियाशिल सदस्य
नेपाली कांग्रेस (राठौर पक्ष)
अन्यौलता छाएको छ । सहमती गरेर अगाडि बढ्नु पर्छ । आज राती १२ बजे भित्र थाहा हुन्छ निर्वाचन हुन्छ कि हुँदैन भनेर । यहाँ दुई पक्ष छन । दुबै पक्षका बिच भागवण्डा मिलेको छैन । दुबैले ५०-५० प्रतिशत पदहरु बाँडफाँड गरे मिल्न सक्छ । बजारमा ७५-२५ को कुरो पनि आएको छ । अब राती सम्ममा मेलमिलाप हुनसक्छ ।
नारायण मल्ल
क्रियाशिल सदस्य तथा वडा नं ३ अध्यक्ष
(गौतम पक्ष)
चुनाव हुने नहुने कुरा आधिकारिक रुपमा अहिलेसम्म थाहा नभएको अवस्था छ तर हामी तयारी अवस्थामा छौँ । मधुवन-३ का क्रियाशिल सदस्य हामीहरु निर्वाचनको तयारीमा छौँ । चुनाव हुने नहुने बारे अहिले भन्न नसकिने अवस्था छ ।
सरस्वती शाह
क्रियाशिल सदस्य (राठौर पक्ष)
जिल्ला सदरमुकाम गुलरियामा नेताहरुको मिटिङ-बैठक बसिरहेको अवस्था छ । चुनाव त १५५ जनामा हुन्छ । १२५ मा ३० जना थप भएकैबाट चुनाब हुनुपर्छ र हुन्छ ।
बलिराम चौधरी
क्रियाशिल सदस्य तथा मधुवन नगरपालिका सह-सभापति(गौतम पक्ष)
नगरसमितिको तर्फबाट १२५ जनामानै चुनाव हुनुपर्छ भनेर हामिले नेताहरुलाई भनेका छौँ । मलाई के लाग्छ भने विधि र प्रक्रिया भन्दापनी नेताहरु हावी भएको हामिले महसुश गरेका छौँ ।
नेताहरुले चाहे भने वडा अधिवेशन हुन्छ हैन भने हुँदैन ।
राजकुमार पुरी
क्रियाशिल सदस्य(राठौर पक्ष)
यो सबै बिगारेको केन्द्रिय स्तर र जिल्ला स्तरका नेताहरुले हो । हामी त कस्तो भयौँ भने नेताले जे भने त्यही गर्ने । यो परिपाटी राम्रो होइन । पार्टिकै नेताहरु अधिवेशन हुन दिन चाहन्नन । हामी त हुनुपर्छ गर्नुपर्छ भन्ने पक्षमा छौँ । १२५ र पछि आएको ३० जना समावेश गरेर अधिवेशन हुनुपर्छ भन्ने पक्षमा छौँ ।
रञ्जित वीर विक्रम शाह
क्रियाशिल सदस्य(गौतम पक्ष)
चुनाव अन्यौलमा छ । अहिले साँझको ५ बज्यो चुनाव अनिश्चित छ । रातभरिमा जे पनि हुन सक्छ । विधि र प्रक्रिया भन्दा बाहिर गएर चुनाव हुन दिँदैनौँ । केन्द्रीय निर्वाचन समितिले पारित गरेको कांग्रेसको आधिकारिक वेब पोर्टलमा राखेको नामबाट मात्र निर्वाचन हुन्छ । त्यो बाहेक जबर्जस्ति गर्न हामी दिँदैनौँ ।
