ज्ञानु संगम खड्का/काठमाडौं : लोकप्रिय नायक पल शाह र नायिका पूजा शर्मा स्टारर चलचित्र "म यस्तो गीत गाउँछु २"को रिलिज मिति तय गरिएको छ।
बलिउड चलचित्र "सूर्यवंशी" रिलिजमा आएसंगै नेपाली चलचित्र निर्माताहरुले पनि रिलिज मिति तय गरिरहेका छन् । यसैबीच, बहुप्रतिक्षित चलचित्र "म यस्तो गीत गाउँछु २" आगामी माघ १९ गतेदेखि रिलिज आउने यसै चलचित्रका निर्देशक सुदर्शन थापाले जानकारी दिए।
कुनै एक चलचित्र मात्र नभई पुरै नेपाली चलचित्र क्षेत्रनै चलायमान हुनु अहिलेको आवश्यकता रहेको भन्दै सुदर्शनले आफ्नो फेसबुकमा रिलिज मिति तय गरेको पोस्टर सार्वजनिक गर्दै औपचारिक जानकारी दिएका हुन् ।
साथै, सधैझै सम्पूर्ण चलचित्रकर्मी, पत्रकार र दर्शक महानुभावहरुबाट साथ र सहयोगको अपेक्षा समेत सुदर्शनले गरेका छन् । कोरोनाका कारण रिलिज हुन नसकेको चलचित्र अब रिलिज हुनेभएपछि नेपाली दर्शकहरु निकै उत्साहित बनेका छन् ।
सुदर्शन थापा निर्देशित यस् चलचित्रमा पल र पूजाको मुख्य भुमिका रहेको छ। पल र पूजाका अलवा हरिहर शर्मा, दिनेश डिसी, राजाराजेन्द्र पोखरेल, रोनिका रोकाय लगायतका कलाकारहरुको चलचित्रमा अभिनय रहेको छ।
चलचित्रमा सुदर्शन थापाकै कथा रहेको छ। एउटा प्रेमिल जोडीको प्रेम जीवनमा आउने उतारचढावको कथामा आधारित चलचित्रको पटकथा शिवम अधिकारी र दिनेश न्यौपानेले लेखेका हुन् ।
सुदर्शन र पूजा चलचित्रका निर्माता हुन् भने जन्म जय साम्पाङ राई चलचित्रका सह-निर्माता रहेका छन् । चलचित्रमा सौरभ लामाको छायांकन, बनिश शाहको सम्पादन एवम् रामजी घिमिरेको कोरियोग्राफी रहेको छ।
त्यस्तै, अर्जुन पोखरेलको संगीत चलचित्रमा रहेको छ। अस्मिता अधिकारी, सोनम तोप्डेन लगायतले यस् चलचित्रको गीतमा आवाज दिएका छन् ।
करिब २ वर्ष अघि नै रिलिज हुने भनिएपनि कोरोनाका कारण चलचित्र रिलिज हुन सकेको थिएन । तर "तिम्रो घरको वरिपरि" बोलको गीत भने रिलिज गरिएको थियो। जुन गीतलाई दर्शक स्रोताले अत्याधिक रुचाएका छन् ।
पहिलो सिक्वेल अत्याधिक रुचाएका दर्शकले यस् चलचित्रको दोस्रो सिक्वेल कत्तिको रुचाउँछन् त्यो त रिलिज मिति नै कुर्नुपर्ने हुन्छ।
