काठमाडौँ । गोरखनाथ सेवा संघ, बाह्र पन्थी नाथ योगी महासंघका पदाधिकारीहरुले खस आर्य सूचीकरण सम्बन्धमा राष्ट्रिय समावेशी आयोगसंग छलफल गर्नुभएको छ ।
आयोगका अध्यक्ष डा. राम कृष्ण तिमल्सेनाको अध्यक्षतामा भएको उक्त कार्यक्रममा आयोगका सदस्यहरु, शान्ति सेवा आश्रम गोरखनाथ सेवा संघका डा. चिन्तामणी योगी, नेपाल सिक्षण परिषदका महामन्त्री डा. वासुदेव शास्त्री, बाह्र पन्थी नाथ योगी महासंघका अध्यक्ष प्रा.डा करविर नाथ योगी, विश्व हिन्दु महासंघका उपसभापति शंकर खराल, पुष्पराज पुरुष, डा. नमन उपाध्याय, भुवन नाथ लगायतको सहभागिता रहेको थियो ।
उक्त कार्यक्रममा नाथ पन्थ: चिन्तन, संस्कार एवं संस्कृति सम्बन्धमा डा. चिन्तामणी योगीले कार्यपत्र प्रस्तुत गर्नुभएको थियो भने बार्ह पन्थी नाथ योगी सम्बन्धमा प्रा.डा. करवीर नाथ योगीले बिचार प्रस्तुत गर्नुभएको थियो ।
उक्त कार्यक्रममा आयोगका अध्यक्ष डा. तिमल्सेनाले आयोगबाट खस आर्य थर सूचीकरणका सम्बन्धमा अध्ययन भैरहेको, कुन जात/थर कसरी समेट्ने भन्ने सम्बन्धमा आयोगले छलफल, तथ्य र मापदण्डको अध्ययनको आधारमा गर्दै जाने बताउनुभयो । उहाँले भन्नुभयो, "जात/थर पहिचानको लागि हो, यो सबैलाई जोड्नका लागि हो, सबैलाई समेट्दै लैजाने कुरामा विश्वास दिलाउन चाहन्छु । अन्तरक्रियामा आएका सबै बिषयमा आयोग सकारात्मक छ र यो बिषय नेपाल सरकार समक्ष लग्नेछौँ"
यस्तै कार्यक्रममा डा. चिन्तामणी योगीले गुरु गोरखनाथको महिमा एवं यस् सम्प्रदायको पहिचान, संस्कार र संस्कृतिका बिषयमा प्रस्तुतीकरण पेश गर्दै नाथ योगी शैव सम्प्रदायको एउटा दर्शन र परम्परा रहेको बताउनुभयो । उहाँले भन्नुभयो, "यो गोरखनाथ परम्परासंग गाँसिएको र नेपालको राष्ट्र निर्माणसंग जोडिएको विषय हो । यो दशनामी होइन, यसलाई छुट्टै रुपले खस आर्यमा समेट्न आवश्यक छ । नेपालको धर्म संस्कृति कर्मकाण्ड तिर मात्र गएको र ज्ञान विस्तारमा संकुचन भएकोले अब हिन्दु संस्कृति र नाथ परम्परालाई राष्ट्रिय जिवनमा अगाडि बढाउन अनुसन्धान केन्द्र बनाउन आवश्यक छ ।"
यस्तै बाह्र पन्थी नाथ योगी महासंघका अध्यक्ष प्रा.डा करविर नाथ योगीले बाह्र पन्थी नाथ योगीलाई सिमान्तकृत अल्पसंख्यक जातिका रूपमा आरक्षण गर्नुपर्ने बताउनुभयो । उहाँले भन्नुभयो, "बाह्र पन्थी नाथ योगीलाई सिमान्तकृत अल्पसंख्यक जातिका रूपमा आरक्षण गर्दै यस् सम्प्रदायका पहिचान संस्कृतिको संरक्षण गर्दै संविधानमा छुट्टै जातिको रूपमा लिपिवद्ध गर्नुपर्छ ।"
त्यस्तै डा. वासुदेव शास्त्रीले देश निर्माण र सुक्ष्म परम्परा नाथबाट आएको र नाथको अमुर्त संस्कृतिबाट क्रमशः मुर्त संस्कृतिमा रुपान्तरण हुँदै आएको बताउनुभयो । उहाँले भन्नुभयो, "नाथ थर सूचीकरणसंग गाँसिएको विषय मात्र नभएर हिन्दु संस्कृतिसंग गाँसिएको विषय हो । भिन्न दर्शन,पहिचान र संस्कृतिका धनी गुरु गोरखनाथ जसको नेपाल निर्माणमा महत्वपूर्ण भूमिका छ, उहाँका अनुयायी नाथ योगीको अस्तित्व संबैधानिक रुपमा अन्त्य हुनु अत्यन्त दुखद र खेद जनक छ ।"
यस्तै आयोगका सदस्य मान प्रसाद खत्रीले थर सूचीकरणको सिलसिलामा आयोगले छुटेका थर संलग्न गरी पठाउन सबै पालिकामा परिपत्र गरिने/पठाइने आयोगको कार्यक्रम रहेको हुँदा सोरोकारवाला सबैलाई आ-आफ्नो पालिकाबाट पनि थप गराउन अनुरोध गर्नुभयो । उहाँले भन्नुभयो, "आगामी महिना भित्र देश भरका ७५३ वटा पालिका भित्र रहेका सबै जात जाती धर्म संस्कृतिका बारे लेखी पठाउन ७५३ वटै पालिकामा पत्राचार गरिनेछ र त्यसमा नाथयोगी सम्प्रदायले आफ्नो संस्कृति संस्कारका बारे सम्बन्धित पालिका मार्फत सुचना पठाउनुहोला ।"
हेर्नुहोस् राष्ट्रिय समावेशी आयोगले जारी गरेको प्रेस नोट
