बर्दिया । कोभिड-१९ को महामारीका कारण पीडित बन्न पुगेका विपन्न बर्गका १ सय परिवारलाई राहत वितरण गरिएको छ । दिनानुदिन ज्याला मजदुरी गर्ने तथा विपन्न किसानका परिवारलाई सामुदायिक विकास तथा सरोकार केन्द्रले राहत स्वरुप चामल दाल लगायतका खाद्यान्न एक कार्यक्रमका बिच वितरण गरेको हो।
गुलरिया नगरपालिकाका नगर प्रमुख मुक्ति नाथ यादवको प्रमुख आतिथ्य, सामुदायिक विकास तथा सरोकार केन्द्र, गुलरिया-६ का अध्यक्ष सुशील लामिछाने तथा नेपाल पत्रकार महासंघ बर्दियाका अध्यक्ष यादव आचार्यको आतिथ्यमा राहत वितरण गरिएको हो ।
उक्त कार्यक्रममा केन्द्रका अध्यक्ष सुशील लामिछानेले कोभिड-१९ का कारण प्रत्यक्ष परोक्ष रुपमा विपन्न परिवारका दाजुभाइ तथा दिदिबहिनी र आमा बुबाहरु पीडामा परेकोले थोरै भएपनि मल्हम लगाउन राहत वितरण गरिएको बताउनुभयो । उहाँले भन्नुभयो, "सामाजिक र मानविय काम गर्न पाउनु मेरोलागी अहो-भाग्य हो । आगामी दिनमापनी मानवीय सेवा र कर्ममा अनवरत रुपमा लाग्नेछु ।"
त्यस्तै कार्यक्रममा नेपाल पत्रकार महासंघका बर्दिया जिल्ला अध्यक्ष यादव आचार्यले विपन्न, आर्थिक अवस्था कमजोर भएका स्थानीय जनताकोलागी राहत वितरण गरेर मानविय कार्य गरेको भन्दै प्रशंसा गर्नुभयो । उहाँले भन्नुभयो, "कोभिड-१९ को महामारीबाट पीडित जनतालाई सहयोग गरेकोमा अत्यन्तै हर्षित छु, फेरि कोरोनाको नयाँ भेरिएन्ट 'ओमिक्रोन' नेपालमा समेत भेटिएकोले सामाजिक दुरि कायम राख्दै मास्क लगाएर हिँड्न आग्रह गर्छु ।"
सामुदायिक विकास केन्द्रले गुलरिया नगरपालिकाका वडा नं- ६, ७, ३, ८, ५ र ४ का कोभिडबाट परोक्ष पीडित परिवारलाई राहत स्वरुप खाद्यान्न वितरण गरेको हो । केन्द्रले बढैयाताल गाउँपालिकामा पनि राहत वितरण गर्ने कार्यक्रम रहेको जानकारी दिएको छ।
