तस्वीर: प्रधानमन्त्री शेरबहादुर देउवा आइतबार सिंहदरबारमा प्रथम राष्ट्रिय ज्येष्ठ नागरिक दिवसका अवसरमा महिला, बालबालिका तथा ज्येष्ठ नागरिक मन्त्रालयबाट आयोजित कार्यक्रममा वाङ्मय शताब्दी पुरूष सत्यमोहन जोशीलाई दुबोको मालाले सम्मान गर्दै ।
काठमाडौँ । नेपाल सरकारले आज विभिन्न कार्यक्रम गरी प्रथम राष्ट्रिय ज्येष्ठ नागरिक दिवस मनाएको छ । मन्त्रिपरिषद्ले निर्णय गरेअनुसार महिला, बालबालिका तथा ज्येष्ठ नागरिक मन्त्रालयले आज ‘सभ्य नागरिकको पहिचान : ज्येष्ठ नागरिकको सम्मान’ भन्ने नाराका साथ दिवस मनाएको हो ।
प्रधानमन्त्री एवम् नेपाली कांग्रेसका सभापति शेरबहादुर देउवाको प्रमुख आतिथ्यतामा विभिन्न मन्त्री, सङ्घसंस्थाका प्रतिनिधि, ज्येष्ठ नगारिकलगायतको उपस्थितिमा कार्यक्रम आयोजना गरिएको थियो ।
उक्त कार्यक्रमका वक्ताले ज्येष्ठ नागरिक अनुभव र ज्ञानका खानी भएको भन्दै उहाँहरूको सामाजिक सुरक्षा, स्वाथ्य हेरचाह र सम्मानमा राज्य, विभिन्न सङ्घसंस्थाका साथै प्रत्येक घरपरिवारले पनि आफ्नो दायित्व निर्वाह गर्नुपर्नेमा जोड दिनुभएको थियो ।
कार्यक्रममा गृहमन्त्री बालकृष्ण खाणले ज्येष्ठ नागरिकको सम्मान, सामाजिक सुरक्षा, हेरचाह राज्यको दायित्व भएको र त्यो दायित्व पूरा गर्न सरकार प्रतिबद्ध रहेको अवगत गराउनुभयो ।
साथै उहाँले सभ्य समाज निर्माणका लागि ज्येष्ठ नागरिकको सामाजिक सुरक्षा, सम्मान र हेरचाह अपरिहार्य रहेकामा जोड दिँदै यसमा सबै निकाय र घरपरिवारको पनि उत्तिकै जिम्मेदवारी रहेको बताउनुभयो । मन्त्री खाणले आधुनिक, सभ्य र समृद्ध समाज निर्माणका लागि ज्येष्ठ नागरिकको अनुभव, शिक्षा र ज्ञानको आवश्यकता औँल्याउनुभयो ।
सङ्घीय मामिला तथा सामान्य प्रशासन मन्त्री राजेन्द्रप्रसाद श्रेष्ठले संविधानअनुसार समाजिक सुरक्षाको हक र ज्येष्ठ नागरिकको हक कार्यान्वयन गर्नु समाजवादको महत्वपूर्ण आधार भएको उल्लेख गर्दै सरकारले जनताका मौलिक हक कार्यान्वयनका लागि विभिन्न कल्याणकारी कार्य अघि बढाएको बताउनुभयो ।
उहाँले ९० वर्ष उमेर पुगेका र थला परेका ज्येष्ठ नागरिकलाईसामाजिक सुरक्षा भत्ता घरमै गएर उपलब्ध गराउन सरकारले आवश्यक व्यवस्था मिलाएको जानकारी गराउनुभयो ।
स्वास्थ्य तथा जनसङ्ख्या मन्त्री विरोध खतिवडाले केन्द्रीय सरकारसँगै प्रदेश र स्थानीय सरकारले पनि ज्येष्ठ नागरिकका लागि जमघट हुने, छलफल गर्ने र भजनकिर्तन गर्ने विभिन्न केन्द्र तथा पार्कको निर्माण गरिरहेको बताउँदै सरकारले ज्येष्ठ नागरिक उपचारका लागि छुट्टै अस्पताल बनाउने बारेमा छलफल गरिरहेको जानकारी गराउनुभयो ।
उहाँले ज्येष्ठ नागरिकलाई बृदाश्रम राखेर समस्या समाधान नहुने बताउँदै उहाँहरुलाई माया, स्नेह र सम्मान आवश्यक पर्ने भएकाले यसमा सरकारसँगै सबै घर परिवारले पनि आफ्नो दायित्व निर्वाह गर्नुपर्नेमा जोड दिनुभयो ।
महिला मन्त्री उमा रेग्मीले ज्येष्ठ नागरिकको सम्मान र उचित हेरचाह बिना सुसस्कृत सभ्य समाजको निर्माण हुन नसक्ने बताउँदै सरकारले कानूनअनुसार ज्येष्ठ नागरिकलाई प्राप्त सेवा सुविधा कार्यान्वयनमा पहलकदमी लिएको उल्लेख गर्नुभयो । उहाँले काठमाडौँको गोठाटारमा ५० बेडसहितको ज्येष्ठ नागरिक अस्पताल र १७० जना क्षमताको बृदाश्रम बनाउने कार्यको थालनी यही आर्थिक वर्षबाट आरम्भ भएको समेत जानकारी गराउनुभयो ।
मन्त्रालयका सचिव यमकुमारी खतिवडा, शताब्दी पुरुष डा सत्यमोहन जोशी, ज्येष्ठ नागरिक राष्ट्रिय महासङ्घका अध्यक्ष छत्र प्रधानलगायतले ज्येष्ठ नागरिकले राज्य र समाजका लागि गरेको योगदानको कदर गर्दै ज्येष्ठ नागरिकको हेरचाह, स्वास्थ्य उपचार र सम्मानमा सबैको योगदान आवश्यक रहेकामा जोड दिनुभयो ।
कार्यक्रममा राष्ट्रपति विद्यादेवी भण्डारीले पठाउनुभएको शुभकामना सन्देश सचिव खतिवडाले बाचन गरेर सुनाउनुभएको थियो । यसैगरी प्रधानमन्त्री देउवाले डा जोशीलाई माला र खादालगाई सम्मान गर्नुभएको थियो भने अन्य ज्येष्ठ नागरिकलाई मन्त्री रेग्मीले सम्मान गर्नुभएको थियो ।
