बर्दियामा पत्रकारहरुसंग बाल अधिकार सम्बन्धि संवेदनशील रिपोर्टिङ कसरी गर्ने भन्ने बारे गहन छलफल
बर्दिया । बाल अधिकार, लैंगिक समानता, परम्परागत हानिकारक रिपोर्टिङ अभ्यासहरु र बाल संवेदनशील रिपोर्टिङ प्रणालीबारे सरोकारवालाहरुले बर्दियाका संचारकर्मी पत्रकारहरुसंग छलफल/तालिम गोष्ठी गरेका छन ।
उक्त छलफल/तालिम कार्यक्रममा संचारकर्मी पत्रकारहरुले बालबालिका सम्बन्धी रिपोर्टिङ, सोधखोज र अनुसन्धान गरेर प्रकाशन प्रसारण गर्ने क्रममा विभिन्न समस्याहरु आउने गरेको सरोकारवालाहरुलाई जानकारी गराउनुभएको थियो ।
छलफल कार्यक्रममा नेपाल पत्रकार महासंघ बर्दिया जिल्ला अध्यक्ष यादव आचार्यले बर्दिया जिल्लामा रहेका सम्पुर्ण पत्रकारहरुले बालअधिकारको बारेमा आवाज उठाउन कुनै कसर नछाडेको बताउनुभयो ।
उहाँले भन्नुभयो, "बालबालिकाको हक अधिकार र लैंगिक समानताकोलागी बर्दिया जिल्लाका पत्रकारहरु दत्तचित्त भएर लाग्नुभएको छ तर ती घटनाहरुमा कतिपय अवस्थामा संचारकर्मीलाई नै कठिनाइ आउने भएकाले तालिमले सहज बनाउने विश्वास छ ।"
उहाँले बर्दिया जिल्लाका संचारकर्मीहरुले बाल अधिकार, लैंगिक समानताका बारेमा सशक्त रुपमा आवाज उठाइरहेको बताउनुभयो ।
त्यस्तै वरिष्ठ पत्रकार बालकृष्ण ओलीले अपांगता भएका, कमजोर आर्थिक अवस्था भएका तथा वृद्धबृद्धाहरुको क्यारिकेचर(नक्कल/अभिनय/हाँसोको पात्र बनाउने)गरेर विपन्न वर्गका नागरिकहरुको प्रतिबिम्ब स्वरुप टेलिसिरिएल तथा धाराबाहिकहरुमा हाँस्यको पात्र बनाएकोमा दुख ब्यक्त गर्नुभयो ।
उहाँले भन्नुभयो, "बालबालिका, विपन्न वर्ग तथा लैंगिक समानताको विषयमा भेदभाव पुर्ण रुपमा धाराबाहिकहरुमा देखाएर उनिहरुलाई हास्यास्पद तरिकाले प्रस्तुत गरिएको छ । यो गम्भीर विषय हो ।"
त्यस्तै नेपाल प्रेस युनियनका सचिव दुर्गा आचार्यले टेलिभिजनकर्मीहरुलाई बालबालिकासंग सम्बन्धित रिपोर्टिङका क्रममा धेरै समस्यासंग जुध्नुपर्ने अवस्था रहेको बारे अवगत गराउनुभयो ।
त्यस्तै नेपाल कागजका सह-सम्पादक पत्रकार सन्दिप योगीले बालबालिकाको बारेमा रिपोर्टिङ गर्दै समाजलाई झकझक्याउँदै बालअधिकारका बारेमा बोध गराउनु पर्ने बताउनुभयो ।
उहाँले भन्नुभयो, "नेपाल पत्रकार महासंघ बर्दियाको समन्वयमा पत्रकारहरुलाई दिइएको तालिम र गरिएको छलफलले सकारात्मक उर्जा थपेको छ । नेपाल पत्रकार महासंघ, बर्दियाको अहम भुमिकामा बाँके युनेस्को क्लब र प्लान इन्टरनेसनल संस्थाले गहन छलफल गर्ने प्ल्याटफर्म उपलब्ध गराउँदै तालिम दिएकोमा धन्यबाद । बालबालिकाहरुको हक,हित अधिकार लगायत लैंगिक समानता र बाल संवेदनशील रिपोर्टिङ प्रणाली बारे गहन छलफल र तालिमले बर्दियाको पत्रकारिताको क्षेत्रमा थप नयाँ आयाम थपेको छ ।"
२०७८ फाल्गुन ९ देखि ११ सम्म उक्त कार्यक्रम बर्दियाको गुलरियामा चल्ने आयोजकहरुले जानकारी दिनुभएको छ । पत्रकारहरुलाई लैंगिक समानता, बाल अधिकार सम्बन्धी संबेदनशिल विषयमा लेख्दा प्रकाशन प्रशारण गर्दा अपनाउनुपर्ने साबधानी तथा ती सम्बन्धि कानुन तथा ऐन बारे नेपाल पत्रकार महासंघ लुम्बिनी प्रदेश उपाध्यक्ष शुक्रॠषि चौलागाईंले तालिम दिनुभएको थियो । उहाँले बाल अधिकार, लैंगिक समानताका बारे लेख्दा परम्परागत शैलीमा गरिने रिपोर्टिङमा परिवर्तन ल्याउनुपर्ने बारे तालिममा प्रकाश पार्नुभएको थियो ।
बाँके युनेस्को क्लब र प्लान इन्टरनेसनल संस्थाको नेपाल पत्रकार महासंघ, बर्दियासंगको समन्वयमा भएको छलफल/तालिमको पहिलो दिनमा जिल्लाका क्रियाशिल पत्रकारहरु र सरोकारवालाहरुको बिचमा बाल अधिकार, लैंगिक समानता, परम्परागत हानिकारक अभ्यासहरु र बाल संवेदनशील रिपोर्टिङ प्रणाली बारे गहन छलफल भएको थियो ।
बालबालिकाहरुको बारेमा रिपोर्टिङ गर्दा पत्रकारले के कस्ता कुरामा ध्यान दिनु पर्ला भन्ने विषयको बारेमा समेत छलफल भएको थियो ।
बालबालिकाको तस्वीर प्रयोग गर्दा ब्लर गरेर वा अनुहार नदेखिने गरि प्रकाशन प्रशारण गर्न पत्रकारहरुलाई प्रशिक्षक तथा महासंघ लुम्बीनि प्रदेश उपाध्यक्ष चौलागाईंले ध्यानाकर्षण गराउनुभएको थियो ।
कार्यक्रममा बर्दियाका क्रियाशिल पत्रकारहरुको उल्लेख्य सहभागिता रहेको थियो ।
