काठमाडौँ । कैलालीका अर्जुन दासको हत्यामा संलग्न ४ जना पक्राउ परेका छन । महानगरीय अपराध महाशाखाले शुक्रबार काठमाडौंमा पत्रकार सम्मेलन गरी घटनामा संलग्न १० जना मध्ये ४ जनालाई रूपन्देहीको बेलहिया सिमानाकाबाट बैशाख १ गते राति पक्राउ गरेको जानकारी दिएको छ ।
तस्वीर : अर्जुन दासको हत्या गरिएको घटनास्थल
यसरी पक्राउ पर्नेहरुमा सोही गाउँपालिका वडा नम्बर ९ का १९ वर्षीय सुमिद साउद, बमबहादुर बोहोरा, दिलिप दास र मनोज भण्डारी रहेका छन्।
तस्वीर : अर्जुन दासको हत्याको आरोपमा संलग्न आरोपी
केही समय भारतको विभिन्न ठाउँमा फरार रहेका उनीहरूलाई कामको खोजी गर्ने क्रममा बेलहिया सीमानाकामा आएको सूचना आएपछि स्थानीय प्रहरीको समन्वयमा महाशाखाले खटाएको विशेष टोलीले पक्राउ गरेको महानगरीय अपराध महाशाखाले जानकारी दिएको छ ।
तस्वीर : अर्जुन दासको हत्या गरिएको घटनास्थल
अपराध महाशाखाले दिएको जानकारी अनुसार पक्राउ परेकाहरूले दिएको प्रारम्भिक बयान अनुसार मोबाइल सेट चोरीको आरोपमा दासलाई खुकुरीले घाटी छिनाली हत्या गरिएको थियो ।
तस्वीर : अर्जुन दासको हत्याको आरोपमा संलग्न आरोपी
हत्याको आरोपमा संलग्न चारै जनामाथि कर्तव्य ज्यान कसुरमा जिल्ला प्रहरी कार्यालय, कैलालीमा मुद्दा दायर गरिएको र आजै उनीहरूलाई कैलाली प्रहरीलाई जिम्मा लगाइएको महानगरीय अपराध महाशाखाका प्रवक्ता कृष्णप्रसाद कोइरालाले बताउनुभयो । महाशाखाले हत्या आरोपमा पक्राउ परेकाहरू लागू औषध सेवनमा संलग्न रहेको पनि जनाएको छ ।
तस्वीर : अर्जुन दासको हत्याको आरोपमा संलग्न आरोपी
हेर्नुहोस् महानगरीय अपराध महाशाखाले जारी गरेको प्रेस विज्ञप्ति
“कैलालीमा अर्जुन दासको विभत्स हत्या गरी फरार रहेका प्रतिवादीहरू पक्राउ” (२०७९।०१।०२)
घटनाविवरण :-
मिति २०७८।०९।०३ गते जिल्ला कैलाली, जानकी गा.पा.वडा नं.-९ अमरावती सामुदायिक वन-जंगलमा ऐ.स्थायी ठेगाना भएका वर्ष २५ को अर्जुन दासलाई मोबाइल चोरी गरेको आरोपमा मनोज भण्डारी समेतका साथीहरूको समूहले लागूऔषध (Nitravet-10) सेवन गरी कुटपिट गर्दै घाईते बनाई साजको रूखमा बाधी खुकुरी प्रयोग गरी घाँटी छिनाली विभत्स हत्या गरी फरार रहेका मनोज भण्डारी समेत ४ (चार) जना व्यक्तिहरूलाई जिल्ला रुपन्देही, सिदार्थ न.पा.वडा नं.०१ बेलहिया सिमानाकाबाट गोप्य सूचनाको आधारमा यस अपराध महाशाखाबाट खटिएको विशेष अनुसन्धान टोलीले मिति २०७९।०१।०१ गते पक्राउ गरी जिल्ला प्रहरी कार्यालय, कैलालीमा निजहरू विरुद्ध कर्तव्य ज्यान कसुरमा मुद्दा दर्ता रहेकोले थप अनुसन्धान तथा कारवाहीको लागि मिति २०७९।०१।०२ गते जिल्ला प्रहरी कार्यालय, कैलाली पठाइएको र सो सम्बन्धमा थप अनुसन्धान जारी रहेको ।
पक्राउ व्यक्तिहरू:
१.नाम : सुमित साउद
उमेर : १९ वर्ष
ठेगाना : जानकी-०९, कैलाली
२.नाम : बमे भन्ने बम बहादुर बोहोरा
उमेर : १९ वर्ष
ठेगाना : जानकी-०९, कैलाली
३. नाम : रोनी परियार भन्ने दिलिप दास
उमेर : १९ वर्ष
ठेगाना : जानकी-०९, कैलाली
४.नाम : मनोज भण्डारी
उमेर : १९ वर्ष
ठेगाना : जानकी-०९, कैलाली
अनुसन्धानको क्रममा खुल्न आएको कुराहरूः
•घटना हुन भन्दा ३ दिन अगाडि कमल साउदको मोबाईल फोन हराएको विषयलाई लिई निजले सुमित साउदलाई शंका गरी कुटपिट गरेको ।
•सुमित साउद पिटिएको विषयमा मनोज भण्डारी र बम बहादुर बोहोरा समेतले कमल साउदको अं.रू.२५ हजार बराबरको लागूऔषध Nitravet-10 चोरी गरी जंगलमा लुकाएको ।
•अर्जुन दासले मोबाइल चोरी हर्के भाटलाई दिएको कुरा सुमित साउदले पत्ता लगाई उक्त मोबाइल कमल साउदलाई फिर्ता दिएको ।
•कमल साउदको मोबाइल चोरी गरेको र सुमित साउदलाई कुटपिट गरेको विषयमा मुख्य दोषी अर्जुन दास हो भनि मनोज भण्डारी, सुमित साउद, बम बहादुर बोहोरा, शुशिल मयाल, दिलिप दास, बादल वि.क., करण दर्नाल समेतले अर्जुन दासलाई कुटपिट गर्ने योजना बनाएको ।
•मिति २०७८।०९।०२ गते बेलुका अं.१८:०० बजे मृतक अर्जुन दास र निजका साथिहरू लागूऔषध सेवन गर्न उक्त सामुदायिक वनमा भेला भएका ।
•सबैजनाले लागुऔषधको सेवन गरे पश्चात: कमल साउदको चोरी भएको मोबाइल र सुमित साउदलाई कुटपिट गरेको विषयमा मृतक अर्जुन दासलाई दोषी देखाई सवैजना मिलेर कुटपिट गरी हातखुट्टा बाधी राखेको ।
•मृतक अर्जुन दासलाई हातखुट्टा बाधी ४/५ घण्टा राखे पश्चात: सवैजनाको मार्ने योजना अनुसार शुशिल मयालले खुकुरी उपलब्ध गराई आफू घर फर्केको ।
अं. राति २३:०० बजे मनोज भण्डारी लगायतका समूहले मृतक अर्जुन दासलाई साजको रूखमा हातखुट्टा बाधी खुकुरी प्रयोग गरी घाँटी छिनाली विभत्स हत्या गरी टाउको २ फीट टाढा राखी सवैजनाले लागूऔषध सेवन गरी रातभरी घटनास्थलमा नै बसेको ।
•मिति २०७८।०९।०३ गते विहान ०५:०० बजे मनोज भण्डारी, बादल वि.क., दिलिप दास, बमे बोहोरा, सुमित साउद र विवेक सिंह भारतको दिल्ली तर्फ लागेको र कनकलाल वि.क., करण दर्नाल, शुशिल मयाल र नाम थर वतन नखुलेको शुशिल मयालको साथी कैलाली मै लुकी बसेको ।
•सुमित साउद, मनोज भण्डारी, दिलिप दास र बमे बोहोरा भारतका विभिन्न स्थानमा बस्दै आएकोमा हाल काम खोज्दै जिल्ला रूपन्देही, सिद्धार्थ न.पा.वडा नं.०१ बेलहिया बोडरबाट मिति २०७९।०१।०१ गते १६:१५ बजे पक्राउ गरेको ।
