नेपालगन्ज । करिब एक किलो सुन सहित बाँकेको खजुराबाट एक जनालाई प्रहरीले पक्राउ गरेको छ । पक्राउ पर्नेमा बझाङ जिल्लाको जय पृथ्वी नगरपालिका वडा नम्बर १ पिमी कैलाश बस्ने २८ वर्षीय अशोक बहादुर सिंह रहेका छन ।
जिल्ला प्रहरी कार्यालय बाँकेले दिएको जानकारी अनुसार हार, मंगलसूत्र, वाला, दाना, झुम्की, रामलीला, झाला, ब्रास्लेट, कानपासा, औठी, टप, फुली, टुक्राहरू, पत्थर र माला सहित बिभिन्न प्रकारका ८०२ ग्राम ७३ मिलि ग्राम करिब ६२ लाख बराबरको सुनका गरगहना सहित सिंहलाई खजुरा गाउँपालिका वडा नम्बर -२ एल गाउँको सुवेदी चोकबाट बाँके प्रहरीले पक्राउ गरेको हो ।
पक्राउ परेका २८ वर्षीय अशोक बहादुर सिंह
जिल्ला प्रहरी कार्यालय बाँकेका अनुसार आइतबार, वैशाख १८, २०७९ गते राती करिब ७:२० बजे शंकास्पद तरिकाले हिँडडुल गरिरहेका सिंहले प्रहरीलाई देखेर भाग्न खोजेका थिए । ईलाका प्रहरी कार्यालय धनौली र प्रहरी चौकी राधापुरबाट खटिएको संयुक्त प्रहरी टोलीले उनलाई नियन्त्रणमा लिएर खानतलासी चेकजाँच गर्दा कालो रङगको झोला भित्र ८०२ ग्राम ७३ मिलि ग्राम करिब ६२ लाख बराबरको सुनका गरगहना फेला परेको हो ।
जिल्ला प्रहरी कार्यालय बाँकेले दिएको जानकारी अनुसार मिति २०७९।०१।०४ गते तद् अनुसार २०२२।०५। २२ तारिखमा भारतको ब्याङ्लोरमा रहेको सुन पसलबाट सिंहले चोरी गरेको प्रारम्भिक अनुसन्धानबाट खुल्न आएको हुँदा भारतीय प्रहरी सँग समन्वय गरी आवश्यक अनुसन्धान कार्य जारी रहेको छ ।
अनुसन्धानमा प्रभाव पर्ने भएको र अन्य संलग्न व्यक्ति पक्राउ नपरेको हुँदा मालसमान धनीहरूको नाम गोप्य राखिएको बाँके प्रहरीले बताएको छ ।
बाँके प्रहरी स्रोतका अनुसार केही दिन अघि नेपाल–भारतका सुरक्षा अधिकारीहरूको बैठक बसेको थियो । उक्त बैठकमा निर्वाचनका बेला सुरक्षा चुनौती बढ्न सक्ने भएकाले निर्वाचनअघि ७२ घण्टा सम्म सीमा नाका बन्द गर्ने निर्णय भएको थियो भने सीमा क्षेत्रमा हुने आपराधिक गतिविधिलाई रोक्न दुबै देशका सुरक्षा अधिकारीहरूले समन्वय गर्ने निर्णय भएको थियो ।
सोही अनुसार बाँके प्रहरीले अन्तरदेशीय अपराधलाई रोक्न चालेको विशेष कदम स्वरुप भारतमा चोरी गरेर नेपाल छिरेका सिंह पक्राउ परेका हुन ।
आसन्न स्थानीय तह निर्वाचनलाई स्वच्छ, निष्पक्ष र धाँधलीरहित रुपमा सम्पन्न गराउन बाँके प्रहरीले सुरक्षा सतर्कता बढाएको अवस्था छ ।
जिल्ला प्रहरी कार्यालय बाँकेका प्रमुख प्रहरी उपरीक्षक (एसपी) श्यामकृष्ण अधिकारीले नेपाल कागजसँग कुरा गर्दै भन्नुभयो, "यो घटनाको विषयमा थप अनुसन्धान जारी छ, कुनैपनि अपराध हुन नदिन र अपराधीलाई कानुनको दायरामा ल्याउन बाँके प्रहरी परिचालित छ । तँपाइले भनेको जस्तो भारतीय सुरक्षा अधिकारीहरूसँग हाम्रो बैठक बसेको थियो । सिमा क्षेत्रमा हुने अपराध नियन्त्रणमा दुबै देशका सुरक्षाकर्मीहरूले एकआपसमा समन्वय गरिरहेका छन । समन्वय पहिला पनि हुन्थ्यो, अहिले पनि छ ।"
प्रहरी अनुसन्धानमा सुन सक्कली रहेको प्रमाणित भएको एसपी अधिकारीले बताउनुभयो ।
