दाङ । दाङको शान्तिनगर गाउँपालिकाको अध्यक्ष पदमा नेपाली कांग्रेसका प्रमोद बस्नेत र उपाध्यक्षमा प्रेमा बुढाथोकीले विजय हासिल गर्नुभएको छ ।
नवनिर्वाचित बस्नेतले पाँच हजार ७१६ मत प्राप्त गर्नुभएको छ भने उहाँका निकटतम प्रतिद्वन्द्वी नेकपा (एमाले)का विष्णु केसीले चार हजार ५२४ मत प्राप्त गर्नुभएको निर्वाचन अधिकृतको कार्यालय शान्तिनगरले जनाएको छ । त्यस्तै नेकपा(माओवादी केन्द्र)का अध्यक्ष पदका उम्मेदवार मोहन वलीले दुई हजार ७९४ मत प्राप्त गर्नुभएको छ ।
त्यस्तै उपाध्यक्षमा कांग्रेसका प्रेमा बुढाथोकीले पाँच हजार ७५० मत ल्याएर विजयी हुनुभएको छ । उहाँका निकटतम प्रतिद्वन्द्वी एमालेका कमला भण्डारीले चार हजार २८ मत प्राप्त गर्नुभएको छ । मओवादी केन्द्रका उम्मेदवार राधिका परियारले तीन हजार ८० मत प्राप्त गर्नुभएको हो ।
यसअघि पनि शान्तिनगरमा कांग्रेसले नै जितेको थियो । शान्तिनगरमा कूल २० हजार ८६३ मतदाता रहेकोमा १४ हजार ८०१ मत खसेको थियो । विसं २०७४ को स्थानीय तहको निर्वाचनमा शान्तिनगर गाउँपालिकामा एमालेले एउटा मात्रै वडा जितेको थियो भने माओवादीले तीन वटा र कांग्रेसले तीन वटा वडा जितेको तर, यस पटक एमालेले एउटा वडा थप्न सफल भयो ।
एमालले वडा नं ४ र ६ जित्न सफल भयो । यसअघिको निर्वाचनमा पनि एमालेले ४ नम्बर वडा जितेको थियो भने कांग्रेसले जितेको ६ नम्बर वडा पनि जित्न सफल भएको छ ।
त्यस्तै कांग्रेसले अहिले वडा नं ३, ५ र ७ नम्बर जित्न सफल भएको छ । ३ नम्बर यसअघि कांग्रेसले नै जितेको थियो भने वडा नं ५ र ७ लाई माओवादी केन्द्रबाट खोस्न सफल भएको छ तर कांग्रेसले यसअघि जितेको २ नम्बर वडा आफ्नो हातमा ल्याउन सकेन । उक्त वडा स्वतन्त्रका सुनिल वली जित्न सफल हुनुभएको छ । वली कांग्रेसमा आबद्ध भए पनि पार्टीले टिकेट नदिएपछि स्वतन्त्र भएर चुनाव लड्नुभएको थियो ।
सोही वडा कांग्रेसका दाङ जिल्ला सभापति शङ्कर डाँगी, निवर्तमान गाउँपालिका अध्यक्ष कमानसिंह डाँगीको वडा हो । माओवादीले वडा नं १ जितेको र सोही वडामा पुरानै वडाध्यक्ष जङ्गबहादुर पुनः निर्वाचित हुनुभएको छ । अहिले माओवादीले दुईवटा वडा गुमाउनुपर्यो ।
त्यस्तै पश्चिम दाङको बबई गाउँपालिकाको अध्यक्ष पदमा कांग्रेसका कुलबहादुर केसी, उपाध्यक्षमा बमकुमारी खड्काले विजय हासिल गर्नुभएको छ । नवनिर्वाचित केसीले हजार ६१५ मत प्राप्त गर्नुभएको छ भने उहाँका निकटतम प्रतिद्वन्द्वी एमालेका भुवनेश्वर पौडेलले पाँच हजार ५३८ मत प्राप्त गर्नुभएको छ ।
नेकपा (माओवादी केन्द्र)का उम्मेदवार भीमबहादुर वलीले दुई हजार १८ मत प्राप्त गर्नुभएको निर्वाचन अधिकृतको कार्यालय हापुरेले जनाएको छ । पौडेल निर्वतमान अध्यक्ष हुनुहुन्छ ।
त्यस्तै उपाध्यक्ष कांग्रेसका बमकुमारी खड्का छ हजार ४०० मत प्राप्त गरी विजयी हुनुभएको छ । उहाँका निकटतम प्रतिद्वन्द्वी एमालेका सावित्रा विश्वकर्माले पाँच हजार ४१४ र माओवादी केन्द्रका अञ्जु घर्तीले दुई हजार २५६ मत प्राप्त गर्नुभएको छ ।
विश्वकर्मा निर्वतमान उपाध्यक्ष हुनुहुन्छ । कूल २२ हजार १४४ मतदाता रहेकोमा १५ हजार ४२४ अर्थात् ६१.६५ प्रतिशत मत खसेको थियो ।
