कर्णाली । सुर्खेतको भेरीगङ्गा नगरपालिकामा नेकपा (एमाले)का उम्मेदवार विजयी भएका छन् ।
नेपाली कांग्रेस–नेकपा (माओवादी केन्द्र)को गठबन्धनलाई पराजित गर्दै प्रमुख पदमा एमालेका यज्ञप्रसाद ढकाल र उपप्रमुख पदमा धनसरा बोहरा निर्वाचित हुनुभएको हो ।
ढकालले १० हजार २२ र उहाँका निकटतम प्रतिद्वन्द्वी कांग्रेसका रामबहादुर सिंहले नौ हजार ७९७ मत प्राप्त गर्नुभयो ।
उपप्रमुखमा विजयी बोहराले नौ हजार ६१४ र उहाँका निकटतम प्रतिद्वन्द्वी माओवादी केन्द्रका नरेन्द्रबहादुर कार्कीले आठ हजार ९१३ मत प्राप्त गर्नुभयो ।
भेरीगङ्गामा विसं २०७४ को स्थानीय तह निर्वाचनमा प्रमुख–उपप्रमुख दुवै पद कांग्रेसले जित हासिल गरेको थियो ।
पश्चिम सुर्खेतमा पर्ने चौकुने गाउँपालिकामा कांग्रेस–माओवादी केन्द्रका साझा उम्मदेवार विजयी भएका छन् । अध्यक्षमा माओवादी केन्द्रका खड्क विक र उपाध्यक्षमा कांग्रेसका नरबहादुर बान्तोला निर्वाचित हुनुभएको छ ।
अध्यक्षमा निर्वाचित विकले एमालेका हरिप्रसाद अधिकारीलाई दुई हजार मत अन्तरले पराजित गर्दै पाँच हजार ४७६ मतले विजयी हुनुभयो । अधिकारीले तीन हजार ४१४ मत प्राप्त गर्नुभयो ।
उपाध्यक्षमा विजयी बान्तोलाले चार हजार ७९१ तथा उहाँका निकटतम प्रतिद्वन्द्वी निर्मला राना मगरले तीन हजार नौ मत प्राप्त गर्नुभयो । राना निवर्तमान उपाध्यक्ष हुनुहुन्छ । विसं २०७४ को स्थानीय तह निर्वाचनमा यहाँ एमाले विजयी भएको थियो ।
जिल्लाका नौमध्ये वीरेन्द्रनगर नगरपालिका र सिम्ता गाउँपालिकामा मत परिणाम सार्वजनिक हुन बाँकी छ । त्यहाँ मतगणना जारी छ । दुवै गाउँपालिकाको मुख्य पदमा एमालेको अग्रता कायमै छ ।
