नेपालगन्ज । १६ वर्षीया किशोरीमाथि सामूहिक बलात्कार गर्ने ७ जनालाई बाँके प्रहरीले पक्राउ गरेको छ ।
पक्राउ पर्नेमा हेमराज थारु, निराजन थारु, विक्रान्त थारु, प्रवीण थारु, राजकुमार थारु, विश्वनाथ थारु र निर्देश थारु रहेका छन ।
जिल्ला प्रहरी कार्यालय बाँकेका अनुसार करिब एक वर्षदेखि फेसबुक मार्फत मित्रता गाँसेका बैजनाथ गाउँपालिका वडा नम्बर ८ का १७ वर्षीय हेमराज थारुले आफ्नो जन्मदिन भन्दै किशोरीलाई भेट्न बोलाएका थिए ।
जन्मदिन भनेर भेट्न आएकी किशोरीलाई हेमराजलगायत ७ जनाले बलात्कार गरेको जिल्ला प्रहरी कार्यालय बाँकेका प्रवक्ता प्रहरी नायब उपरीक्षक (डिएसपी) मधुसुदन न्यौपानेले बताउनुभयो
जिल्ला प्रहरी कार्यालय बाँकेका अनुसार शनिबार राति र आइतबार गरि छुट्टाछुट्टै स्थानमा उनिहरुले किशोरीमाथि बलात्कार गरेका थिए ।
किशोरीलाई सुरुमा मानखोलाको जंगलमा लगेर ५ जना युवाले र पछि बैजनाथस्थित टहरामा लगेर दुई जना युवाले बलात्कार गरेका थिए ।
बाँके प्रहरीका अनुसार आइतबार साँझ एउटै बाइकमा किशोरीलाई घर पुर्याउन जाँदा तीन जना सवार भएकाले प्रहरीले खजुरामा चेकजाँच गरेको थियो ।
चेकजाँच गर्ने क्रममा बेहोस अवस्थामा किशोरीलाई देखेपछि प्रहरीले उद्धार गरेको हो । उद्धार पछि प्रहरी अनुसन्धानमा पटक पटक ७ जनाले बलात्कार गरेको घटना खुल्न आएको हो ।
पक्राउ परेका बलात्कार आरोपीहरुलाई खजुरास्थित धनौली प्रहरी चौकीमा राखेर थप अनुसन्धान भइरहेको जिल्ला प्रहरी कार्यालय बाँकेका प्रवक्ता न्यौपानेले बताउनुभयो ।
