बर्दिया । डिभिजन वन कार्यालय बर्दियालाई लुम्बिनी प्रदेश वन तथा वातावरण मन्त्रालयले सम्मान गरेको छ ।
अतिक्रमणको उच्च जोखिम र संवेदनशील क्षेत्रको रुपमा रहेको गुलरिया नगरपालिका वडा नं.–२ संगम बस्ती (बेला फाँटा)क्षेत्रमा स्थानीयको सहभागिता जुटाई वृक्षारोपण कार्य गरेका कारण वन तथा वातावरण मन्त्रालय लुम्बिनी प्रदेशले डिभिजन वन कार्यालय बर्दियालाई सम्मान गरेको हो ।
वन तथा वातावरणको क्षेत्रमा उत्कृष्ट काम गरेकाले डिभिजन वन कार्यालय बर्दियालाई वन तथा वातावरण मन्त्रालय लुम्बिनी प्रदेशका मन्त्री सुरेन्द्र हमालले प्रमाणपत्र प्रदान गर्दै सम्मान गर्नुभएको छ ।
खाली जमिनमा वन बृद्धि गर्न लुम्बिनी प्रदेशको नमुनाकै रुपमा २५.२ हेक्टरमा डिभिजन वन कार्यालय बर्दियाको पहलमा वृक्षारोपण गरिएको छ ।
२५ दशमलव २ हेक्टर क्षेत्रफलमा ५ जातका बिरुवाहरू मोरङ्गा (सितल चिनी), अर्जुन, जमुना, अस्ना र महुवा आदि गरि ४० हजार ३ सय ३६ बिरुवा रोपिएको डिभिजन वन कार्यालय बर्दियाका सूचना अधिकारी तथा सहायक वन अधिकृत द्रोणराज शर्माले जानकारी दिनुभयो ।
डिभिजन वन कार्यालय बर्दियाले विभिन्न खाली रहेको वन क्षेत्रभित्र पर्ने ठाउँहरूमा वृक्षारोपण गर्दै आइरहेको डिभिजन वन कार्यालय बर्दियाका डिभिजनल प्रमुख प्रवीण बिडारीले बताउनुभयो ।
रुख विहीन तथा वन विनाश भएको ठाउँमा वृक्षारोपण गरेर डिभिजन वन कार्यालय बर्दिया तथा त्यहाँ कार्यरत अधिकारीहरूले उदाहरणीय तथा नमुना युक्त कार्य गरेका छन । डिभिजन वन कार्यालयले प्रशंसनीय कार्य गरेको छ ।
