अनोज थारू, हरि गुरुङ, बर्दिया । पछिल्लो समय बर्दिया प्रहरीले अदालतबाट सजाय पाएपछि फरार भएका अपराधी धमाधम पक्राउ गरिरहेको छ । न्यायपालिका (अदालत)बाट कसुर ठहरेर सजाय पाएपछि भागेका अपराधीहरू बर्दिया प्रहरीको फन्दामा परिरहेका छन ।
बिभिन्न ठाउँमा लुकिछिपी बसेका त्यस्ता अपराधीहरूलाई प्रहरीले खोजी खोजी पक्राउ गर्दै अदालतमा बुझाउँदै गरिरहेको छ ।
हिँजो शुक्रबार भाद्र १७ गते (२०७९।०५।१७) बिहान ०६:०० बजे ०८ वर्ष कैद सजाय पाएपछि फरार भएका ४४ वर्षीय मुक्ति थारूलाई ईलाका प्रहरी कार्यालय बनियाभार बर्दियाबाट खटिएको प्रहरी टोलीले बारबर्दिया नगरपालिका वडा नम्बर ०१ मा रहेको आफ्नै घरमा लुकेको अवस्थामा पक्राउ गरेर जिल्ला अदालत बर्दियामा बुझाएको जिल्ला प्रहरी कार्यालय बर्दियाले जानकारी दिएको छ ।
थारूलाई बर्दिया जिल्ला अदालतको लगत नं. १६२८, मिति २०७५।०२।०४ गतेको फैसला आदेशले ०८ वर्ष कैद सजाय तोकेको थियो । जिल्ला प्रहरी कार्यालय बर्दिया मातहतको प्रहरी निकायले ४ वर्ष ३ महिना १५ दिन पछि लुकिछिपी बसेका फरार अपराधी मुक्ति थारुलाई पक्राउ गर्न सफल भएको हो । हाल थारूलाई जिल्ला अदालत बर्दियाको आदेशमा कारागार चलान गरिएको छ ।
त्यस्तै नकबजनी चोरी मुद्दामा ८०,१०० जरिवाना र १ महिना ५ दिन कैद सजाय जिल्ला अदालत बर्दियाबाट पाएपछि फरार भएका अपराधी समिर चौधरीलाई बर्दिया प्रहरीले पक्राउ गर्न सफल भएको छ ।
जिल्ला अदालत (न्यायपालिका) बर्दियाको फैसलाले लगत कट्टी नं. १०४४ ले कैद सजाय र जरिवाना तोकेपछि फरार भएका समिर चौधरीलाई ईलाका प्रहरी कार्यालय राजापुर बर्दियाबाट खटिएको प्रहरी टोलीले लुकिछिपी बसेको अवस्थामा सोनपुर बजारबाट पक्राउ गरेको हो ।
राजापुर नगरपालिका वडा नम्बर ०१ टिउनी बस्ने २६ वर्षीय समिर चौधरीलाई मिति २०७९।०५।१५ गते बर्दिया जिल्ला अदालत समक्ष उपस्थित गराइएकोमा जिल्ला अदालत बर्दियाको आदेशले बर्दिया कारागार चलान गरिएको जिल्ला प्रहरी कार्यालय बर्दियाका प्रवक्ता प्रहरी नायव उपरीक्षक (डेप्युटी सुपेरिटेण्डेण्ट अफ पोलिस) डिएसपी हिक्मत बहादुर बोहराले जानकारी दिनुभयो ।
त्यस्तै २०७९-०४-३० गते शरीर बन्धक तथा जबर्जस्ती करणी जस्तो गम्भिर मुद्दामा जिल्ला अदालत बर्दियाबाट ८ वर्ष कैद सजाय पाएपछि फरार रहेका बलात्कारी कधही चमारलाई जिल्ला प्रहरी कार्यालय बर्दियाबाट खटिएको प्रहरी टोलीले पक्राउ गर्न सफल भएको छ ।
जिल्ला अदालत बर्दियाले २०७८-०३-२९ गते बर्दियाको गुलारिया नगरपालिका वडा नम्बर १० बस्ने चमारलाई ८ वर्ष कैद सजाय फैसला गरेपछि उनी फरार थिए ।
फरार रहेका बलात्कारी चमार १ वर्ष १ महिना २ दिन पछि पक्राउ परेका हुन । जिल्ला प्रहरी कार्यालय बर्दियाको प्रमुखको रुपमा कमाण्ड एन्ड क्राइम कन्ट्रोलमा गहिरो दख्खल राख्ने प्रहरी अधिकारीको रूपमा प्रहरी संगठन भित्र छबी बनाउन सफल प्रहरी उपरीक्षक (सुपेरिटेण्डेण्ट अफ पोलिस) एसपी बिरेन्द्र बहादुर शाहीले जिल्लाको नेतृत्व लिएपछि उहाँको टिमको सक्षम अनुसन्धानका कारण लामो समयदेखि फरार भएर कानुन भन्दा टाढा भागेका जघन्य अपराधमा संलग्नहरू धमाधम पक्राउ परिरहेका छन ।
यस विषयमा पुर्व डिआइजी वीरशरण थापासँग जिज्ञासा राख्दा बर्दिया प्रहरीको बारेमा टिप्पणी गर्दै भन्नुभयो, "फरार अपराधीहरू कानुनको दायरामा ल्याउनु प्रहरीको मस्ट इम्पोर्टेन्ट् टास्क हो किनभने अदालतले अपराधी तोकेपछि उसले सजाय भुक्तान गर्दैन भने त्यो समाजको लागि पनि घातक हो र अपराध गरेर सजाय पाएका अपराधी कानुनको दायरामा नआएर सजाय भुक्तान नगरेमा पिडीतले न्याय नपाएको अनुभुती गर्छन् तसर्थ बर्दिया प्रहरीको यो कार्यले सम्पूर्ण बर्दिया प्रहरी सफल र चुस्त अनुसन्धान र कानुन कार्यन्वयनमा अब्बल छ भन्ने दर्शाउँछ ।"
