कपिलवस्तु । कपिलवस्तु क्षेत्र नं ३ मा प्रतिनिधिसभा सदस्यका लागि नेपाली कांग्रेसका उम्मेदवार अभिषेकप्रताप शाह चुनावी मैदानमा हुनुहुन्छ ।
उहाँ २०६३ सालयता निरन्तर सांसद रहनुभएको छ । शाह चौथोपटक सांसद बन्ने प्रयासमा हुनुहुन्छ ।
उहाँ २०७० सालमा सङ्घीय समाजवादी, २०७४ मा नेपाली कांग्रेस र अहिले पुनः गठबन्धनबाट उम्मेदवार बन्नुभएको हो ।
विसं २०७४ को निर्वाचनमा शाहले २० हजार एक मत ल्याउनुभएको थियो । विगतमा गरेको कामका आधारमा अहिले आफू सहजै जित्ने शाहको दाबी छ ।
कपिलवस्तु–३ मा एमालेबाट मङ्गलप्रसाद गुप्ता उम्मेदवार बन्नुभएको छ । गुप्ता २०७४ सालमा जसपाबाट उम्मेदवार बन्नुभएको थियो । सो क्षेत्रमा जनता प्रगतिशील पार्टीका महासचिव ईश्वरदयाल मिश्र उम्मेदवार हुनुहुन्छ ।
गत निर्वाचनमा स्वतन्त्र समूहबाट सूर्य चिह्न लिएर उठेका मिश्र यसपटक भने आफ्नै पार्टीबाट उम्मेदवार बन्नुभएको हो । कपिलवस्तुमा ठूला दलले पूरानै उम्मेदवार दोहोर्याएका छन् ।
नयाँ अनुहारका रूपमा कपिलवस्तु–१ बाट लौरो अभियानका देवेन्द्रकुमार शर्मा र कपिलवस्तु–३ बाट मौलिक जरोकिलो पार्टीका यमन उपाध्याय उम्मेदवार बन्नुभएको छ ।
कपिलवस्तु क्षेत्र नं १ बाट नेकपा (माओवादी केन्द्र)ले चक्रपाणि खनाललाई उम्मेदवार बनाएको छ ।
नेकपा (एमाले)बाट बलराम अधिकारी चुनावी मैदानमा होमिनु भएको छ । विसं २०७४ मा वाम गठबन्धनबाट विजयी खनाल यसपटक कांग्रेसको साथ लिएर निर्वाचनमा उत्रिनुभएको छ ।
गत निर्वाचनमा खनालले २९ हजार सात सय ९९ मत ल्याउँदा प्रतिस्पर्धी कांग्रेसका दीपकुमार उपाध्यायले २८ हजार आठ सय ५३ मत पाउनुभएको थियो ।
एमालेले २०७० सालमा निर्वाचित बलराम अधिकारीलाई उम्मेदवार बनाएको छ । गत निर्वाचनमा अधिकारी र खनाल एकै ठाउँमा थिए । क्षेत्र नं १ मा दुवै पहिलाकै सांसद हुन् ।
कपिलवस्तु क्षेत्र नं २ मा गठबन्धनका उम्मेदवार सुरेन्द्रराज आचार्य र एमालेका वृजेश गुप्ताबीच प्रतिस्पर्धा हुने देखिन्छ । दुवै नेता पटक–पटक सांसद र मन्त्रीसमेत भइसकेका व्यक्ति हुन् ।
दुईपटक कांग्रेसका जिल्ला सभापति भएका आचार्य गत निर्वाचनमा गुप्तासँग पराजित हुनुभएको थियो । गुप्ता भने चारपटक सांसद भइसक्नुभएको छ ।
