बर्दिया । गृह मन्त्रालयका सचिव विनोद प्रकाश सिंहले पुस ८ गते बाँसगढी ईलाका प्रशासन कार्यालयको भवन उद्घाटन गर्नुभएको छ ।
गत शुक्रवार एक कार्यक्रमका बिच उहाँले बाँसगढी नगरपालिका वडा नं ८ मा रहेको ईलाका प्रशासन कार्यालयको भवन उद्घाटन गर्नुभएको हो । उद्घाटन कार्यक्रममा ईलाका प्रशासन कार्यालय स्थापनाको लागि जग्गा दिने जग्गादाता लक्ष्मीदेवी पौडेल, कृष्ण प्रसाद आचार्य र कृष्ण प्रसाद अधिकारीलाई दोसल्ला र प्रमाण पत्रले सम्मान समेत गर्नुभएको छ ।
गृह सचिव विनोद प्रकाश सिंहले उद्घाटनको क्रममा बर्दिया जिल्लासँग भावनात्मक सम्बन्ध रहेका कारण बर्दियाको सदरमुकाम देखि टाढा रहेका स्थानीय तहहरूमा ईलाका प्रशासन राख्नु पर्ने आफ्नो सहमति रहेको बताउनुभयो ।
साथै बर्दियाको शान्ति सुरक्षा र सुशासन कायम गर्न प्रहरी चौकीको स्तर उन्नतिका लागि आफू प्रर्यत्नशील रहेको समेत उहाँले बताउनुभयो ।
३ करोड ८२ लाख ३६ हजार बराबरको लागत एस्टिमेट रहेको कार्यालय भवन निर्माणको लागि २ करोड १९ लाख ३१ हजारमा ठेक्का सम्झौता भएको ईलाका प्रशासन कार्यालय बाँसगढीका प्रमुख डिल्लीराम आचार्यले बताउनुभयो ।
उहाँका अनुसार हाल सम्म १ करोड ८४ लाख १७ हजार कुल निर्माण खर्च भएको र कार्यालय परिसर भित्र काम सम्पन्न भएको छ भने कार्यालय देखि राजमार्ग सम्मको बाटो ग्र्याभील र नाली निर्माण गर्ने काम बाँकी रहेको ईलाका प्रशासन प्रमुख आचार्यले बताउनुभयो ।
भवन उद्घाटनको अवसरमा बाँसगढी नगरपालिकाका नगर प्रमुख खडक बहादुर खड्काले गृह सचिव विनोद प्रकाश सिंहलाई बिभिन्न खाले माग सहित पत्र बुझाउनु भएको थियो ।
.jpg)
बाँसगढी नगरपालिकाका नगर प्रमुख खनक बहादुर खड्काले गृह सचिव विनोद प्रकाश सिंहलाई बुझाउनुभएको पत्रमा गरिएको माग...
१.मोतीपुर इलाका प्रहरी कार्यालयको स्तरबद्धि, अस्थायी प्रहरी चौकी लक्ष्मणा, ककौरा र बबई चेपाङ्गमा संरचना निर्माणको माग ।
२.बाँसगढी नगरपालिका वडा नम्बर २ र ३ को बिचमा अस्थायी प्रहरी चौकी स्थापना ।
३.बाँके र बर्दियाको सिमाना मान खोलामा सशस्त्र प्रहरी बलको स्थापना ।
साथै बाँसगढी नगरप्रमुख खडक बहादुर खड्काले वडा नम्बर २ र ३ वडाको सिमानामा तत्काल प्रहरी चौकी स्थापनाको लागि नगरपालिकाबाट निर्णय गरेर केन्द्रीय सरकारलाई पठाइसकेकोले आवश्यक पहल गरीदिन गृह सचिवसंग अग्रह गर्नुभएको छ । .jpg)
बर्दियाका प्रमुख जिल्ला अधिकारी बन्धु प्रसाद बास्तोलाको अध्यक्षतामा भएको भवन उद्घाटन कार्यक्रममा संविधानसभा सदस्य श्याम ढकाल, जिल्ला समन्वय समिति बर्दियाका प्रमुख सूर्य बहादुर विष्ट, बाँकेका प्रमुख जिल्ला अधिकारी सूर्य बहादुर खत्री, बाँसगढी नगरपालिकाका निवर्तमान नगर प्रमुख सालिकराम अधिकारी लगायत राजनीतिक दलका प्रतिनिधि, सुरक्षा निकायका प्रमुख, समाजसेवी, बुद्धिजीवी लगायतको सहभागिता रहेको थियो ।
बाँसगढी नगरबासीहरूको माग र आवश्यकता अनुसार २०७३ जेठ २६ गते देखि बाँसगढीमा ईलाका प्रशासन कार्यालय सञ्चालनमा आएको थियो ।
बाँसगढीका नागरिकहरूलाई घर आँगनबाटै नागरिकता, राहदानी, नाबालक परिचय पत्र, जनजाति, मधेसी, दलित प्रमाणित, ठाडो उजुरी, गुनासो सुनुवाइ जस्ता सेवा उपलब्ध गर्नुका साथै शान्ति सुरक्षा, चोरी तस्करी नियन्त्रण, बजार अनुगमन, सार्वजनिक सम्पत्तिको संरक्षण, विपद् व्यवस्थापन तथा प्रशासनिक कार्यको लागि कार्यालय स्थापना गरिएको थियो ।
अहिले बाँसगढी नगरपालिकामा ईलाका प्रशासन कार्यालय स्थापना भएपश्चात् करिब ६३ हजार भन्दा बढी नागरिकहरू सार्वजनिक सेवाबाट लाभान्वित हुँदै आएका छन् ।
