बर्दिया । “मर्यादित व्यवसाय र प्रविधिमा सहकारी ” भन्ने नारालाई आत्मसाथ गर्दै बाँसगढी नगरपालिकामा अवस्थित बाँसगढी पिपलबोट बचत तथा ऋण सहकारी संस्थाको १४ औँ वार्षिक साधारण सभा सम्पन्न भएको छ ।
एकका लागि सबै, सबैका लागि एक भन्ने मूल मन्त्रकासाथ २०६५ मा ४१ जनाबाट सुरु भएको सहकारी संस्थामा हाल १२४७ जना शेयर सदस्य रहेका छन् ।
बचत तथा ऋण सहकारी उद्यम विकास रोजगारी भन्ने नाराका साथ संस्थाको वित्तीय र भौतिक विकास मात्र नभई संस्थाको प्रतिष्ठा र प्रभाव समेत बिस्तार भइरहेको बताउँदै संस्थाका वर्तमान अध्यक्ष रामचन्द्र अधिकारीको तर्फबाट व्यवस्थापक पूर्ण बहादुर वलीले प्रगति प्रतिवेदन प्रस्तुत गर्नुभएको थियो ।
त्यस्तै संस्थाले आफ्नै भवन स्थापना गरी कार्यालय सञ्चालन गरेर सेवा दिने गरेको र यो वर्ष देखि अनलाइन सिस्टम मार्फत कारोबार अगाडी बढाएको संस्थाका व्यवस्थापक पूर्ण बहादुर वलीले बताउनुभयो ।
खर्च कटौती गरी बचत गर्ने बानीको विकासले आज यो सहकारी संस्थामा दुई करोड ४७ लाख ४७ हजार ३ सय शेयर पुजी रहेको र कुल कारोबार सात करोड ४ लाख ५८ हजार ६८५.८५ पैसा रहेको संस्थाका कोषाध्यक्ष बद्री बरालले जानकारी दिनुभयो ।
त्यसै गरी संस्थाले यो वर्ष ५० लाख ६१ हजार ५८० रुपैयाँ शुद्ध नाफा गर्न सफल भएको छ ।
कार्यक्रममा प्रमुख अतिथि बाँसगढी नगरपालिका नगरप्रमुख खडक बहादुर खडकाले संस्थाको प्रगतिको कामना गर्दै, सहकारीको माध्यमबाट स्वरोजगारी सिर्जना गरी बाँसगढीको सम्बृद्धिसंग जोडेर अगाडी बढाउनको लागि सबैलाई अनुरोध गर्नु भएको थियो ।
त्यसै गरी बाँसगढी नगरपालिकाका पुर्वनगरप्रमुख शालिकराम अधिकारीले सहकारी संस्थाहरूको लक्ष्य र उद्देश्यहरू भन्दा मागहरू अहिले फरक हुँदै गएको बताउनुभयो ।
संस्थाका अध्यक्ष रामचन्द्र अधिकारीको सभा अध्यक्षतामा भएको कार्यक्रममा संस्थाका उपाध्यक्ष नारायण पौडेलले अतिथिहरूलाई स्वागत गर्नुभएको थियो भने जनभावना बचत तथा सहकारी संस्थाका अध्यक्ष सेर बहादुर सुनार, बाँसगढी वडा नं ५ का वडा अध्यक्ष दहवा थारु, संस्थाका संस्थापक अध्यक्ष पुष्पराज बराल, अतिथि शिव कुमार अधिकारी लगायतले आ –आफ्नो शुभकामना मन्तव्य राख्नु भएको थियो ।
त्यसै गरी संस्थाले विभिन्न व्यक्तित्वहरूलाई सम्मान समेत गरेको छ । असल ऋणी भनेर बाँसगढी ५ की मिना थारु र राजेन्द्र गन्धर्वलाई सम्मान गरिएको छ । त्यस्तै नियमित बचतकर्तामा भगवती भट्टराई, उत्कृष्ट बचत कर्तामा हरिस चन्द्र, उत्कृष्ट सेयर धनीमा भोजराज शर्मा र उत्कृष्ट कर्मचारीको रूपमा सरिता गिरीलाई संस्थाले सम्मान गरेको छ ।
