नेपालगन्ज । एक वर्षदेखि ओरालो लागेको नेपालगन्ज भन्सारको राजस्व असुली यस वर्षको पुस मसान्तसम्म कायमै छ ।
आर्थिक वर्ष २०७८÷७९ को साउन र असोजमा मात्र लक्ष्य प्राप्त गरेको नेपालगन्ज भन्सार कार्यालयले त्यसपछि आफ्नो निर्धारित लक्ष्य भेटाउन सकेको छैन ।
भन्सार राजस्व असुलीमा गत वर्ष साउनमा १३१ दशमलव ४८ प्रतिशत लक्ष्य रहेकामा भन्सारले चालु आर्थिक वर्षको साउनमा लक्ष्यको ७५ दशमलव ७१ प्रतिशत मात्रै असुली गर्न सफल भएको छ । सो कार्यालयको भन्सार राजस्व असुली चालु आर्थिक वर्षमा लक्ष्यभन्दा कम देखिएको छ ।
चालु आव २०७९÷८० को साउनमा रु एक अर्ब ७८ करोड पाँच लाख लक्ष्य पाएको भन्सारले जम्मा रु एक अर्ब ३५ करोड चार लाख र भदौमा रु दुई अर्ब २३ करोड ३६ लाख लक्ष्य पाएकामा रु एक अर्ब ४३ करोड ४९ लाख राजस्व असुली गरेको भन्सार अधिृत तथा सूचना अधिकारी डिल्लीप्रसाद शर्माले जानकारी दिनुभयो । यो लक्ष्यको ६४ दशमलव २५ प्रतिशत हो ।
चालु आवको असोजमा भन्सार असुली घटेर लक्ष्यको ५५ प्रतिशतभन्दा कममा झरेको छ । भन्सार कार्यालयको तथ्याङ्कअनुसार, असोजमा रु दुई अर्ब ३४ करोड १९ लाख राजस्व असुलीको लक्ष्य राखिएकामा रु एक अर्ब २८ करोड ४८ लाख (५४ दशमलव ८७ प्रतिशत) मात्रै राजस्व असुली भएको छ ।
मङ्सिरमा नेपालगन्ज भन्सारले लक्ष्यको ५५ दशमलव २१ प्रतिशत मात्रै लक्ष्य हासिल गरेको छ । भन्सारले रु दुई अर्ब ४९ करोड ५० लाख लक्ष्य पाएकामा रु एक अर्ब ३७ करोड ७४ लाख राजस्व सङ्कलन गरेको शर्माले बताउनुभयो ।
पुसमा रु दुई अर्ब ६७ करोड छ लाख लक्ष्य निर्धारण गरिएकामा रु एक अर्ब ५० करोड ८० लाख राजश्व सङ्कलन गरेको छ । यो लक्ष्यको ५६ दशमलव ३० प्रतिशत हो ।
नेपालगन्ज भन्सारले आव २०७८÷७९ मा रु २५ करोड २१ लाख छ लाख लक्ष्य पाएकामा रु २२ अर्ब ३१ करोड २६ लाख भन्सार राजस्व असुल गरेको थियो । यो लक्ष्यको ८८ दशमलव ५१ प्रतिशत हो ।
चालु आव २०७९÷८० का लागि अघिल्लो आव २०७८÷७९ मा भन्दा रु चार अर्ब बढी लक्ष्य नेपालगन्ज भन्सारले पाएको छ ।
अघिल्लो आवमा रु २५ अर्ब राजस्व असुलीमा असफल नेपालगन्ज भन्सारलाई थप रु चार अर्ब बढी थपेर चालु आवका लागि लक्ष्य निर्धारण गरिएको हो ।
भन्सारले चालु आव २०७९÷८० मा रु २९ अर्ब ३२ करोड ९५ लाख लक्ष्य निर्धारण गरेको हो । आव २०७८÷७९ मा भन्सारले रु २५ करोड २१ लाख छ लाख लक्ष्य पाएको थियो ।
सरकारको आयात र निर्यात नीतिले यसलाई प्रभावित गरेको हुनसक्ने भन्सार अधिृत शर्माको भनाइ छ ।
