कपिलवस्तु । तौलिहवा स्थित फलफूल व्यापारीको तीस लाख रुपैयाँ लुकाएर चोरी गरेको आरोपमा एक स्टिल फर्निचर मर्मत केन्द्रका मालिक र उनका छोरा पक्राउ परेका छन् ।
तौलिहवाको बस पार्कमा रहेको स्टिल फर्निचर मर्मत केन्द्रका मालिका एस माहोम्मद फकिर र उनका छोरा ईसराज फकिर चोरीको आरोपमा पक्राउ परेका हुन् ।
कपिलवस्तु नगरपालिका वडा नम्बर १ का फलफूलका थोक व्यापारी सनी उल्लाह कुजाडाले आफ्नो बिग्रेको दराज मर्मत गर्न गत फागुन १ गते आफ्नी श्रीमती रेशमा कुजडा मार्फत सो मर्मत केन्द्रमा दराज पठाएका थिए । केही दिन अघि फलफूल व्यापारी कुजडाले आफ्नी श्रीमती रेशमालाई ३० लाख रुपैयाँ नगद राख्न दिएका थिए । रेशमाले सो रकम त्यही दराजको लकरमा राखेकी थिइन । फलफूल व्यापारीको घरमा विवाह परेकोले सबै जना त्यसैमा व्यस्त थिए। दराजको लक्कर माथि समेत साढे चार लाख रकम राखिएको थियो । जनु रकम रेशमाले निकालेर घरमै राखेकी थिई । रेशमाले सो दराज मर्मत गर्न फर्निचर मर्मत केन्द्रमा पठाईन । तर लकरमा रहको ३० लाख रुपैयाँ भने निकाल्न बिर्सिइन ।
फागुन ४ गते फलफूल व्यापारी सनी उल्लाहले सो पैसा श्रीमतीसँग माग्दा ३० लाख मर्मत गर्न भनी पठाएको दराजमै रहेको बताइन् । त्यसको केही बेरमै व्यापारी सनी र उनका भाइ सहित मर्मत केन्द्रमा पुगेर पैसा दिन आग्रह गरे । तर फर्निचर मर्मत व्यापारी एस माहोम्मले आफूलाई त्यस बारे केही जानकारी नभएको बताए ।
फलफूल व्यापारीले तत्कालै तौलिहवा वडा प्रहरी कार्यालयमा मौखिक उजुरी दिएका थिए । उजुरी लगत्तै फर्निचर मर्मत केन्द्रका मालिक एस माहोम्मदको घरमा खान तलासी गर्दा २४ लाख ७७ हजार नगद फेला परेको प्रहरी नायब उपरीक्षक मीन बहादुर घलेले बताउनुभयो ।
फर्निचर मर्मत व्यापारीले केही पैसा खर्च भएको प्रहरी समक्ष बयान दिएका छन् । एस मोहम्मद फकिर र निजको छोरा वर्ष २१ को इसराज फकिरलाई पक्राउ गरी अनुसन्धान कार्य भइरहेको प्रहरी उपरीक्षक घलेले बताउनुभयो । दुवैमाथि चोरीको मुद्दा लगाइएको छ ।
फलफूल व्यापारी र फर्निचर मर्मत केन्द्रका मालिकबिच आपसी मित्रता समेत रहेको थियो । मर्मत केन्द्रमा काम गर्ने मिस्त्रीले सो दराज मर्मत गर्दा लकरमा रकम देखे पछि आफ्नो बुवालाई फोन गरेर के गर्ने भनी सोधेका थिए । उनका बुवाले सो रकम बारे फर्निचर मर्मतका मालिकलाई जानकारी दिन भनेका थिए ।
त्यस पछि सो रकम फर्निचर मर्मत केन्द्रका मालिकले घरमा लुकाएका थिए । मिस्त्रीलाई एक हप्ताको छुट्टी समेत दिएका थिए । फलफूल व्यापारी र फर्निचर मर्मत केन्द्रका व्यापारी दुवैको बोलाउने नाम गुड्डु हो ।
