काठमाडौँ । नेपाल टेलिभिजनका प्रमुख कार्यक्रम निर्माता डा टङ्क उप्रेती यस वर्षको बद्री राष्ट्रिय कलाश्री पत्रकारिता पुरस्कारबाट सम्मानित हुनुभएको छ ।
उहाँलाई नेपाली कला साहित्य डटकम प्रतिष्ठानले काठमाडौँको पर्यटन बोर्डमा एक कार्यक्रम आयोजना गरी आज रु ५० हजार राशिसहित सम्मान गरेको हो ।
वृतचित्रलगायत प्रसारण माध्यमबाट विभिन्न विषय बस्तुका बारेमा जानकारी गराइ योगदान पुर्याएको भन्दै डा उप्रेतीलाई पुरस्कृत गरिएको प्रतिष्ठानकी अध्यक्ष मोमिला जोशीले जानकारी दिनुभयो ।
पत्रकारितासँगै उहाँले निबन्ध र कवितामा पनि कलम चलाउँदै आउनुभएको छ ।
डा उप्रेतीका ‘अनुभूतिका अक्षरहरु’, ‘शब्दहरुको नेपथ्य’, ‘गजुर पग्लिएर’ (कथा सङ्ग्रह), ‘निगुरोको खरानी’ (कथा सङ्ग्रह) र ‘यतै कतै’ (सामूहिक कविता सङ्ग्रह) प्रकाशित छन् । उहाँले आमसञ्चार र पत्रकारितामा विद्यावारिधि गर्नुभएको छ ।
नेपाल टेलिभिजनको स्थायी कर्मचारी डा उप्रेतीले २०४६ सालदेखि निरन्तर नेपाली साहित्य र पत्रकारितामा कलम चलाउँदै आउनुभएको छ ।
प्रतिष्ठानले प्रसिद्ध समालोचक प्राध्यापक डा लक्ष्मणप्रसाद गौतमलाई राष्ट्रिय कलाश्री पुरस्कार प्रदान गरेको छ । सो पुरस्कारको राशि रु एक लाख रहेको छ ।
यस्तै कवि तथा निबन्धकार भूपिनलाई रु ७५ हजार राशिको स–सिद्दि राष्ट्रिय कलाश्री युवा पुरस्कार प्रदान गरिएको छ ।
यसैगरी फोटो पत्रकार जगदिश तिवारी रु ५० हजार राशिको थिरछाँया राष्ट्रिय कलाश्री ललितकला पुरस्कारबाट सम्मानित हुनुभएको छ ।
यस्तै रु ५० हजार राशिको पद्यनेत्र राष्ट्रिय कलाश्री सङ्गीत पुरस्कारबाट गायिका मोलिना राईलाई पुरस्कृत गरिएको छ ।
