बाँकेमा जारी निषेधाज्ञा ७ गतेसम्म थप, यस्तो छ जिल्ला प्रशासन कार्यालय बाँकेले जारी गरेको आदेश
जिल्ला प्रशासन कार्यालय बाँकेले जारी निषेधाज्ञा असार ७ गतेसम्म थप गरेको छ । कोरोना महामारीका कारण जारी निषेधाज्ञा खुकुलो बनाउँदै एक साता थप गरिएको हो ।
कोभिड १९ संक्रमणको दर क्रमशः घट्दै गएको देखिएपनि जोखिमको अवस्था अझै कायमै रहेकाले रोकथाम र नियन्त्रणलाई प्रभावकारी बनाउन बैशाख १३ गतेदेखि जारी निषेधाज्ञालाई बाँके प्रशासनले असार ७ सम्म निरन्तरता दिएको हो ।
जिल्ला प्रशासन कार्यालय बाँकेले बैशाख १३ गतेदेखि जारी निषेधाज्ञालाई प्रत्यक साता बढाउँदै लगेको छ । तर, यसपटकको निषेधाज्ञा भने केही खुकुलो छ ।
प्रमुख जिल्ला अधिकारी शिवराम गेलालले जारी गरेको आदेशमा खाद्यान्न पसल विहान ७ देखि २ बजेसम्म संचालन गर्न अनुमति दिइएको छ भने रेष्टुरेन्टबाट हुने प्याकिङ तथा टेक अवे सेवा, विवाह, ब्रतबन्ध मृत्यु संस्कार लगायतका सामाजिक कार्यहरुमा बढीमा १५ जनासम्म सहभागी हुन पाउने, दैनिक उपभोग्य बस्तु लगायतका पसल व्यवसायहरु विहान ७ बजेदेखि दिउँसो २ बजेसम्म संचालन गर्न पाइने गरी निषेधाज्ञा जारी गरिएको छ ।
वैकल्पिक सिकाईका माध्यमबाट हुने शिक्षण तथा सिकाई, भिडभाड नहुने उपाय अबलम्बन गरी बिमा, बैंक तथा वित्तिय संस्थाबाट हुने सेवा प्रवाह, कृषि कार्य, उद्योग कलकारखाना, निर्माणस्थलमै श्रमिक कामदार रहने गरी निर्माण कार्यलाई निषेध गरिएको छैन ।
निषेधाज्ञामा शैक्षिक संस्था, सबै प्रकारका सभा, गोष्ठी, तालिम, सेमिनार, प्रदर्शन, भेला तथा सम्मेलन, सिनेमा हल, फन पार्क, पार्टी प्यालेस, क्यासिनो, दोहोरी, डान्सर, सैलुन तथा ब्युटी पार्लर, स्विमिङ पुल, जिमखाना, हेल्थ क्लब, पुजारीबाट हुने नित्य पूजा बाहेक धार्मिक तथा सांस्कृति गतिविधि, यात्रुवाहक सार्वजनिक सवारी साधन सञ्चालनमा रोक लगाइएको छ ।
हेर्नुहोस् जिल्ला प्रशासन कार्यालय बाँकेले जारी गरेको आदेश
