काठमाडौँ । विगत ३८ दिनदेखि माइतीघर मण्डलामा रिले अनशन बसिरहेका चिकित्सा शिक्षा सरोकार सङ्घर्ष समितिका पदाधिकारीले सोमबारदेखि अनशन तोडेका छन् ।
मन्त्री बस्नेतले सङ्घर्ष समितिले उठाएका माग सम्बोधन गर्न सरकारले पहल गरिरहेको र चिकित्सा शिक्षा ऐन छिट्टै संशोधन हुने तयारीमा रहेको विश्वास दिएपछि १४ बुँदे माग राखेर अनशन बसेका उनीहरू सङ्घर्ष स्थगित गर्न तयार भएका हुन् ।
अनशन तोडाउन स्वास्थ्यमन्त्री आफ्नो सचिवालयका स्वकीय सचिव रामेश्वर आचार्य र रामचन्द्र दुलाललाई माइतीघरमा पठाउनुभएको थियो ।
मन्त्री बस्नेतका प्रतिनिधि आचार्यले अनशनमा बसिरहेका सङ्घर्ष समितिका सदस्यलाई जुस पिलाएर अनशन स्थगित गर्नुभएको हो ।
अनशन स्थगित गरेपछि चिकित्सा शिक्षा सरोकार सङ्घर्ष समितिका वरिष्ठ पाँच जना पदाधिकारी वार्ता गर्न स्वास्थ्य तथा जनसङ्ख्या मन्त्रालय पुगेका थिए ।
स्वास्थ्य तथा जनसङ्ख्या मन्त्री बस्नेतसहित भएको वार्तामा स्वास्थ्य मन्त्रालयका सचिव डा. रोशन पोखरेल, अतिरिक्त सचिव डा.विकाश देवकोटा, डा. टङ्क वाराकोटीलगायत सहभागी हुनुहुन्थ्यो ।
सङ्घर्ष समितिको तर्फबाट संयोजक निर्मल सापकोटा, सहसंयोजक भुवनचक्र जोशी लगायतका पदाधिकारी थिए ।
वार्तामा सङ्घर्ष समितिका संयोजक सापकोटाले आफूले उठाएका १४ वटा मागका विषयमा मन्त्री बस्नेतलाई जानकारी गराउँदै नेपालको चिकित्सा शिक्षा सुधारका लागि सरकारले आफ्ना माग सम्बोधन हुनुपर्नेमा जोड दिएका थिए ।
स्वास्थ्य मन्त्री बस्नेतले प्रधानमन्त्री विदेशमा रहेका बेला स्वास्थ्य मन्त्री र चिकित्सा सेवा आयोगको सहअध्यक्षको हैसियतले चिकित्सा शिक्षा ऐन संशोधन गरेर अगाडि बढ्न सरकार तयार रहेको जानकारी गराउनुभएको हो ।
मन्त्री बस्नेतले सङ्घर्ष समितिले उठाएका जायज माग समस्या समाधानका लागि अगाडि गर्नुपर्ने पहल कदमीका लागि स्वास्थ्य मन्त्रालयका अतिरिक्त सचिव डा. विकाश देवकोटालाई फोकल व्यक्तिको रूपमा तोक्नुभएको छ ।
चिकित्सा शिक्षा ऐन संशोधन गर्नुपर्ने, सिटिइभिटीको तुरुन्त पुनर्संरचना गर्नुपर्ने, प्रि डिप्लोमाका स्वास्थ्य कार्यक्रम स्तरोन्नति गर्दै बाँकीमा तत्काल भर्ना खोल्नु पर्ने, पारामेडिकल अन्तरगत नर्सिङका विषयहरू चिकित्सा शिक्षाबाट अलग गर्नुपर्ने, बन्द गराइएका नर्सिङ कलेजमा भर्ना खोल्नु पर्ने, छात्रवृतिमा भइरहेको विभेद अन्त्य गर्नुपर्ने, शिक्षामा कोटा प्रणाली खारेज हुनुपर्ने लगायतका १४ वटा माग राखेर सङ्घर्ष समितिले साउन २७ देखि माइतीघर मण्डलामा रिले अनसन जारी राखेको थियो ।
