नेपालगन्ज । बाँकेको नौबस्तास्थित बाल सुधार गृहबाट १५ जना बाल बन्दीहरू फरार भएका छन् । नौबस्तास्थित उक्त सुधार गृहमा यस अघि दुई पक्षबिच झडप र लडाइ परेपछि सुधार गृहमा तोडफोड भएको थियो ।
उक्त विवाद समाधान गर्न प्रमुख जिल्ला अधिकारी आफै गएर सहमति गरे पनि सुधार गृहमा झडप र तोडफोडपछि शुक्रवार र शनिवारसम्म पनि विवाद भइरहेको थियो । यही मौका छोपी भागेका १५ जना बाल बन्दीहरू अझै नभेटिएको अवस्था छ ।
१०१ जना बन्दी रहेको उक्त सुधार गृहमा दुई दिनसम्म विभिन्न माग राखेर बाल बन्दीहरूले आन्दोलन गरेका थिए । उक्त बेला प्रमुख जिल्ला अधिकारी श्रवणकुमार पोखरेलले बालबालिकाले उठाएका जायज माग गर्न भूमिका खेल्ने सहमतिमा गृहका बाल बन्दीहरू सामान्य अवस्थामा पुगेका थिए ।
अहिले १८ वर्ष पुगेका बन्दीहरूलाई बाल सुधार गृहबाट कारागार नसारेसम्म समस्याको समाधान नहुने एक सुरक्षा अधिकारीले नाम नखोल्ने सर्तमा बताए । उनका अनुसार यसो गर्न माथिबाटै (गृह मन्त्रालय) बाटै बाटो खुला गरिदिएमा यस्ता पटक पटक हुने अराजक क्रियाकलाप रोकिन्छ । १८ वर्ष पुगेकालाई कारागार राख्ने नियम, ऐन, नियमावली नबन्दा सुरक्षाकर्मी समस्यामा परेका छन् । सधैँ जसो १८ वर्षका भन्दा माथिका बन्दीहरूले भड्काएर तोडफोड गर्ने गराउने, साना बालबालिकालाई प्रयोग गर्ने, राज्यका सम्पत्ति तोडफोड गरेर अराजकता मच्चाउन ग्र्याण्ड डिजाइन गर्नेहरूका कारण प्रमुख जिल्ला अधिकारी, नेपाल प्रहरीका जिल्ला नेतृत्वहरू प्रेसरमा पर्ने, कनिष्ठ प्रहरी अधिकारी, राजपत्राङ्कित श्रेणीका अधिकारी, जवान, हवलदारहरूलाई समस्या पर्ने अहिलेको अवस्था छ । माथिका हाकिमहरूले के हो शान्ति सुरक्षा किन भएन भनेर सोधपुछ गर्दै पेलानमा पर्ने जिल्लाका अधिकारीहरू । तसर्थ के बुझ्न जरुरी छ भने १८ वर्ष नाघेकालाई अन्यत्र नसार्दासम्म ऐन नियम नबन्दा सम्म जेलर लगायत प्रहरी प्रशासनलाई स्केप गोट (बलिको बोका) बनाउने प्रपञ्च ठुला नीतिनिर्माताले गर्न हुँदैन । सुरक्षा पनि दिने, ढुङ्गा पनि खाने अनि उल्टो आरोप पनि प्रहरी प्रशासनलाई लगाउनु अत्यन्तै गलत कुरा रहेको बुझ्न सकिन्छ र यथार्थ पनि यही हो ।
यता मिडिया रिपोर्टका अनुसार डुडुवास्थित सुधार गृहमा झडप गरेका दुइ समूहबिच पुनः झगडा सुरु भएको बताइएको छ ।
बाँकेको डुडुवामा रहेको बाल सुधार गृहमा असोज ४ गते राति बाल बन्दीका बिचमा आपसमा झडप हुँदा एक जनाको मृत्यु भएको थियो भने ११ जना घाइते भएका थिए । अहिले नौ बस्ता कारागारमा थप जोखिम हुन सक्ने भन्दै सुरक्षा समेत बढाइएको छ ।
१८ वर्ष पुगेका बालबन्दीहरुलाई नौबस्तामा राख्न सुरु गरिएको हो । नौबस्तास्थित क्षेत्रीय कारागार सञ्चालन गरिए पनि चार वटा ब्लक रहेको क्षेत्रीय कारागारको एउटा ब्लकमा बाल सुधार गृह सञ्चालनमा छ ।
यसअघि डुडुवा गाउँपालिका–६, आसमानपुरस्थित जयेन्दु बाल सुधारगृहभित्र रहेका १८ वर्षमाथिका बाल बिजाइँकर्तालाई नौबस्तामा सारिएको थियो ।
