नुन-खुर्सानी संग छाक टार्दै छौँ, हामीलाई देशले बिर्सियो- दाउरा बेचेर जीवन निर्वाह गर्ने अति विपन्न परिवार
बर्दिया । विश्व भरीनै फैलिएको कोरोना संक्रमण रोकथामकालागी सरकारले निषेधाज्ञा जारी गरेपछि यहाँका दाउरा बेचेर जिविका चलाउँदै आएकाहरुलाई छाक टार्नै मुस्किल भएको छ ।
जिल्लाको मधुवन नगरपालिका वडा नं -३ कोठियाघाटमा बस्ने ६ घरपरिवार अहिले खान नपाउने अवस्थामा पुगेको छ ।
स्थानिय सामुदायिक वनबाट दाउरा संकलन गरेर कोठियाघाटमा ल्याएर बिक्रीवितरण गरी आफ्नो तथा परीवारको गुजारा चलाइरहेका ६ परीवार भोकभोकै बस्नुपर्ने अवस्थामा पुगेका छन ।
![](https://www.nepalkagaj.com/uploads/editor/2021-05-12/WhatsApp%20Image%202021-06-18%20at%2015.52.03.jpeg)
दाउरा बेच्दै जीवन निर्वाह गरिरहनु भएकी ५८ वर्षीया बिमला बिश्वकर्मा
दाउरा बेच्दै जीवन निर्वाह गरिरहनु भएकी ५८ वर्षीया बिमला बिश्वकर्मा आफ्नो दुखेसो पोख्दै भन्नुहुन्छ, "लकडाउन भएपछि दाउरा बिक्री हुन छोड्यो, घरमा भएको राशन पनि सकियो । लकडाउन खुलेपछि कमाएर तिरौँला भनेर अहिले ऋण सापटी गरि खाईरहेका छौँं । छोराहरुले काम पाएका छैनन न त बाहिर गएर काम गर्ने अवस्था छ । हामी त भोकै मर्ने अवस्थामा पुगेका छौँ, हाम्रो कुरा कस्ले सुन्ने? हामी गरिब र निमुखा जहिले पनि पिल्सिएका छौँ । के हामीलाई राज्यले बिर्सिएको हो?"
![](https://www.nepalkagaj.com/uploads/editor/2021-05-12/WhatsApp%20Image%202021-06-18%20at%2015.52.04.jpeg)
दाउरा बेच्दै जीवन चलाइरहनुभएकी ६० वर्षिया गोबिन्दि बिक
दाउरा बेच्दै जीवन चलाइरहनुभएकी ६० वर्षिया गोबिन्दि बिकको दुखेसो पनि उस्तै छ । उहाँ भन्नुहुन्छ, "पहिले लकडाउन भन्दा अगाडि दाउरा बेचेर जिवन गुजारा गरिरहेका थियौँ । कहिलेकाहीँ कोठियाघाटमा आएका गाडीहरु धोइदिए वापत आम्दानी हुन्थ्यो । तर अहिले सबै ठप्प भएपछी नुन खुर्सानी भात खाएर बसिरहेका छौँ ।"
उहाँ भन्नुहुन्छ, "नेपालको सबैभन्दा लामो पुल गेरुवा कर्णाली कोठियाघाटमा वनभोज खान आउनेहरुले हाम्रो दाउरा किनिदिन्थे र गुजारा चलेको थियो भने अहिले लकडाउनले गर्दा सबै चौपट भएको छ । न कमाइ छ न आम्दानी छ ! कति दिनसम्म सरसापट गरेर खाने हो हामीले ? सरकारले कहिलेसम्म लकडाउन गर्ने हो केहि थाहा छैन अब त रोगले भन्दा पनि भोकले मर्ने अवस्था आइसक्यो ।"
![](https://www.nepalkagaj.com/uploads/editor/2021-05-12/WhatsApp%20Image%202021-06-18%20at%2015.52.04%20%282%29.jpeg)
त्यस्तै अर्का पिडित ४२ वर्षिय किरण बिश्वकर्मा भन्नुहुन्छ, "या त सरकारले हामीलाई काम दिनुपर्यो कि त खानेपिउने व्यवस्था मिलाईदिनु पर्यो । हामी काम गरेर खाने मान्छे अहिले बेरोजगार छौ । हामीले कसरी आफ्नो बालबच्चा परिवार पाल्ने ? हामी बेरोजगार भएका छौँ । राहतको नाममा नाटक चलेको छ । हुनेखाने र पहुँच भएकाले राहत पाएका छन भने हामी निमुखालाई कसैले पनि हेर्दैन न सरकारले न स्थानीय सरकारले हेरेको छ । के हामी नागरिक होइन?"
कोभिडको महामारी सुरु भएपछि दाउरा संकलन गरि बिक्रीवितरण गर्दै आएका ६ परीवार अहिले नुन खुर्सानीसंग भात खाँदै छन । यी अत्यन्तै बिपन्न वर्गका ६ परीवारका बालबालिकाहरु भोकभोकै बस्नुपर्ने अवस्थामा पुगेका छन ।
![](https://www.nepalkagaj.com/uploads/editor/2021-05-12/WhatsApp%20Image%202021-06-18%20at%2015.52.04%20%281%29.jpeg)