बर्दिया । नेपाल-भारत सीमा सुरक्षा मामिलामा छलफल भएको छ । बर्दिया —नेपाल -भारतका सीमा जिल्लाका सुरक्षा अधिकारीको निरन्तर भैरहेको समन्वय बैठकमा भारतमा हुन लागेको लोकसभा निर्वाचनमा सुरक्षा सवाल, लागूऔषध नियन्त्रण, सीमा क्षेत्रका सुरक्षाकर्मीले गर्ने व्यवहार लगायतका सवालमा छलफल भएको हाम्रो गोप्य स्रोतले बतायो ।
'भारतमा १३ मे मा हुन लागेको लोकसभा निर्वाचनका क्रममा सीमा सुरक्षा प्रबन्धका सवालमा प्रमुख चासोका साथ छलफल भयो,' हाम्रा स्रोतले भने, '७२ घण्टा अगाडिदेखि सीमामा आवतजावत बन्द गर्ने तर अत्यावश्यकीय मानवीय सेवाका साधन तथा वस्तुहरु भने निगरानीमा संचालन गर्ने कुरा भएको छ ।'
बर्दियाका प्रजिअ बेद प्रसाद खरेल, जिल्ला प्रहरी कार्यालय बर्दियाका एसपी प्रविण धिताल ,सशस्त्र प्रहरी बर्दियाका प्रमुख चित्रांगत दहाल पक्षले लागूऔषधको कारोबार तथा प्रयोगको नियन्त्रणलाई प्रमुख चासोका साथ उठाएको र भारतीय सुरक्षा अधिकारीहरु त्यसमा सहमत गराउन सफल भएको जानकारी प्राप्त भएको छ । खुला छलफल पछि बसेको गोप्य काउन्टरपार्ट्स मिटिङमा लागूऔषध कारोबारमा निरुत्साहित गर्न दुवै पक्षले सर्च अपरेशनलाई थप प्रभावकारी बनाउने समझदारी भएको छ भने नेपालको बर्दिया पक्षले कारोबारीहरुको सूची तयार गरेर कारबाही सशक्त रुपमा अगाडी बढाउन दमदार माग उठाएको थियो ।
त्यति मात्र होइन हाम्रो सुरक्षा संगठनका अधिकारीले कुन ठाउँ, कुन गाउँ, र ब्यक्तिकै लिस्ट बनाएर देखाइदिएपछी भारतिय पक्ष लचक भएको थियो । भारतिय एक पत्रकारका अनुसार बर्दियाको सम्पूर्ण सुरक्षा संगठनले गरेको तयारीका कारण भारतीय पक्ष पहिलो पटक दबाबमा परेको थियो किनकी नेपाली पक्षले पिन प्वाइन्ट लोकेसन नै लागूऔषध कारोबारीको देखाइदिएको थियो ।
साथै, दुवै देशका सीमा क्षेत्रका सुरक्षा अधिकारीको बैठकमा सीमा नाकामा सुरक्षाकर्मीहरुले गर्ने व्यवहारबारे पनि गम्भीर समीक्षा भएको छ । भारतबाट फर्किने क्रममा वा जाने क्रममा सीमा नाकामा भारतीय सुरक्षाकर्मीहरुले गर्ने दुर्व्यवहारका सवालमा पनि गम्भीरतापूर्वक कुरा उठेको छ । बर्दियाका प्रमुख जिल्ला अधिकारी बेद प्रसाद खरेलले सीमामा दुवै देशका नागिरकमाथि मानवीय व्यवहारबारे संवेदनशील हुनु पर्ने आवश्यकता औंल्याएका थिए । खासगरी भारतीय पक्षका सुरक्षाकर्मीबाट दुर्व्यवहार खेप्नु परेका गुनासाहरुप्रति बर्दिया प्रजिअ र दुबै सुरक्षा संगठनका प्रमुखको मुख्य चासो थियो ।
बैठकमा प्रमुख जिल्ला अधिकारी, जिल्लाका सहायक प्रमुख जिल्ला अधिकारीहरु, नेपाल प्रहरी र सशस्त्र प्रहरीका जिल्ला प्रमुखहरु सहभागी थिए ।
पहिलो पटक दुवै जिल्लाका वन अधिकृतहरु, आन्तरिक राजस्व कार्यालय प्रमुखहरु र भन्सार प्रमुखहरुलाई पनि बैठकम सहभागी गराइएको विश्वस्त स्रोतको दाबी छ । सीमा क्षेत्रमा वनजन्य वस्तु र वन्यजन्तुको चोरी तस्करी नियन्त्रण, भन्सार तथा राजस्व छली एवं ओसारपसारका सन्दर्भहरुमा पनि दुवै पक्षका सम्बन्धित निकायका अधिकारीहरुबीच छलफल गरी आवश्यक समन्वयको समझदारी भएको छ । यस सुरक्षा समन्वय बैठकको आयोजना भारतीय पक्षका सुरक्षा निकायले गरेका हुन् ।
बैठकमा भारतीय पक्षले सम्युक्त गस्ती गर्ने नेपालका तर्फबाट निर्वाचन नजिकिँदा सहयोग गर्ने, आपराधिक गतिबिधिमा संलग्नलाई निरिक्षण नियन्त्रण वा रेकीमा राख्ने । भारतमा अपराध गरेर नेपाल भाग्न सक्ने भएकाले उक्त विषयलाई गम्भीरता साथ उठाएका थिए । समग्रमा नेपाली पक्षको दमदार प्रस्तुतिमा बर्दियाका अधिकारीहरू सम्मानका हकदार छन् ।
