बर्दिया । भारत उत्तराखण्डको नैनीताल बेतालघाटमा दुर्घटना हुँदा ६ नेपालीको मृत्युु भएको छ । नेपालमा रोजगारी नपाएर भारत मजदुरी गर्न गएका गरिब विपन्न परिवारका सदस्यहरू नै मृत्युको मुखमा परे । यसले सबैलाई स्तब्ध पारेको छ ।
मिडिया रिपोर्टहरुका अनुसार भारतमा मजदुरी गरेर नयाँ वर्ष मनाउन घर फर्किँदै गर्दा सवार जिप उत्तराखण्डको नैनीताल बेतालघाटमा दुर्घटना हुँदा एउटै वडाका पाँचसहित ६ नेपालीको ज्यान गएको छ । पाँच मृतक बाँकेको बैजनाथ गाउँपालिका– ८ फत्तेनगर र हसनापुरका हुन् भने एकजना बर्दियाका हुन् । जिपमा रहेका अर्का एक नेपालीको अवस्था अज्ञात छ ।
घटनास्थलदेखि झन्डै १८ किलोमिटर पूर्व मल्लागाउँ उचाकोटमा खानेपानी आयोजनाको पाइप बिछ्याउने काम सकेर घर फर्किन लागेका नेपालीले बुकिङ गरेको युके ०४ सिसी ०४९५ नम्बरको जिप सोमबार मध्यराति दुर्घटनामा परेको बताइएको छ ।
दुर्घटनामा बैजनाथ– ८ फत्तेनगरका उदयराम चौधरी, ५० वर्षीय अन्तराम चौधरी, ५० वर्षीय विनोद चौधरी, ४५ वर्षीय धीरज चौधरी र हसनापुरका ५२ वर्षीय तिलकराम चौधरीको ज्यान गएको विभिन्न एजेन्सी तथा मिडिया रिपोर्टमा जनाइएको छ । त्यस्तै, बर्दियाको बाँसगढी नगरपालिका– १, बबई चेपाङका ६० वर्षीय टोपबहादुर बस्नेतको मृत्यु भएको छ । दुर्घटनामा परेका फत्तेनगरकै विश्राम थारूको अवस्था भने अज्ञात छ । एउटै वडाका पाँचजनाको मृत्यु हुँदा गाउँनै शोकमग्न अवस्थामा छ ।
फत्तेपुरका धीरज चौधरी र उनकी पत्नी शान्ति सँगै घर फर्किँदै थिए । दुर्घटनामा शान्तिले श्रीमान् गुमाइन् । उनी घाइते भएकी छिन् । शान्ति चौधरी र अर्का घाइते दशरथ चौधरीको तिवारी राजकीय अस्पताल हलद्वानीमा उपचार भइरहेको छ । अन्य मृतकको शव पोस्टमार्टमका लागि डिएसबी अस्पताल नैनीतालमा राखिएको छ ।
हसनापुरका तिलकराम १७ पुसमा मजदुरी गर्न नैनीताल गएका थिए । होलीताका फोनमा कुरा गर्दा उनले नयाँ वर्ष मनाउन घर आउन लागेको पनि बताएका थिए । तर मृत्युको खबर आयो ।तिलकरामकी पत्नी शान्तिदेवी थापा चौधरीका अनुसार दुर्घटनामा परेकाहरू गत पुसमा एकसाथ नैनीताल गएकाहरू हुन् । घटनाको खबर पाएलगत्तै परिवारका सदस्य र आफन्त नैनीताल गएका छन् ।
