बाँकेमा जारी निषेधाज्ञा केही खुकुलो पार्दै एक साता थप, पसल व्यवसायहरु दिउँसो ४ बजेसम्म संचालन गर्न पाइने
नेपालगन्ज । बाँकेमा फेरि एक साता निषेधाज्ञा थपिएको छ । कोभिड १९ संक्रमणको दर क्रमशः घट्दै गएको देखिएपनि जोखिमको अवस्था अझै कायमै रहेको भन्दै रोकथाम र नियन्त्रणलाई प्रभावकारी बनाउन बैशाख १३ गतेदेखि जारी निषेधाज्ञालाई बाँके प्रशासनले असार १४ सम्म निरन्तरता दिएको हो । जिल्ला प्रशासन कार्यालय बाँकेले एक/एक सातामा निषेधाज्ञा बढाउँदै लगेको छ ।
तर, निषेधाज्ञा खुकुलो बनाउँदै लगिएको छ । । रेष्टुरेन्टबाट हुने प्याकिङ तथा टेक अवे सेवा, विवाह, ब्रतबन्ध मृत्यु संस्कार लगायतका सामाजिक कार्यहरुमा बढीमा १५ जनासम्म सहभागी हुन पाउने, दैनिक उपभोग्य बस्तु लगायत अन्य पसल व्यवसायहरु विहान ९ बजेदेखि दिउँसो ४ बजेसम्म संचालन गर्न पाइने गरी निषेधाज्ञा जारी गरिएको छ । वैकल्पिक सिकाईका माध्यमबाट हुने शिक्षण तथा सिकाई, भिडभाड नहुने उपाय अबलम्बन गरी सार्वजनिक निकाय, बिमा, बैंक तथा वित्तिय संस्थाबाट हुने सेवा प्रवाह, कृषि कार्य, उद्योग कलकारखाना, निर्माणस्थलमै श्रमिक कामदार रहने गरी निर्माण कार्यलाई निषेध गरिएको छैन ।
निषेधाज्ञामा शैक्षिक संस्था, सबै प्रकारका सभा, गोष्ठी, तालिम, सेमिनार, प्रदर्शन, भेला तथा सम्मेलन, सिनेमा हल, फन पार्क, पार्टी प्यालेस, क्यासिनो, दोहोरी, डान्सर, सैलुन तथा ब्युटी पार्लर, स्विमिङ पुल, जिमखाना, हेल्थ क्लब, पुजारीबाट हुने नित्य पूजा बाहेक धार्मिक तथा सांस्कृतिक गतिविधि, यात्रुवाहक सार्वजनिक सवारी साधन सञ्चालनमा रोक लगाइएको छ ।
जिल्ला प्रशासन कार्यालय बाँकेले जारी गरेको आदेश
