सन्दिप नाथ योगी, अनोज थारू, बर्दिया । बर्दियाको मधुवनमा रहेको खाता समन्वय समितिको कार्यालयमा तोडफोड तथा आगजनी गरिएको छ ।
वन्यजन्तुबाट पीडित स्थानीयहरुले हिजो सोमबार प्रदर्शन गरेका थिए । विभिन्न माग राख्दै आन्दोलित भएका स्थानिय र सुरक्षाकर्मी बिच झडप हुँदा १८ वर्षीया नवीना थारुको मृत्यु भएको थियो भने राकेश चौधरी गोली लागि घाइते हुनुभएको थियो ।
आज मंगलबार दोस्रो दिन आक्रोशित प्रदर्शनकारीहरुले करिब ३ बजे मधुवन वडा नम्बर -३ मा रहेको खाता समन्वय समितिको कार्यालयमा तोडफोड तथा आगजनी गरेका छन ।
खाता समन्वय समितिको कार्यालय र संगै रहेको रेन्जर पोस्टको कार्यालयमा आक्रोशित प्रदर्शनकारीहरुले तोडफोड तथा आगजनी गरेको बर्दिया मधुवनका युवा नेता सरद राईले जानकारी दिनुभयो ।
खाता समन्वय समितिले मानव वन्यजन्तु द्वन्द न्युनिकरणका क्षेत्रमा काम गर्ने गर्छ । समितिका अध्यक्ष हरि गुरुङले स्थानीय वासिन्दाको मृत्यु भएको घटनाले आफू स्तब्ध भएको बताउनुभयो । उहाँले समन्वय समितीको कार्यालय तोडफोड भएकोमा दुख ब्यक्त गर्नुभयो ।
आज मंगलबार गाउँगाउँबाट ठूलो संख्यामा मानिसहरु आएर मधुवन नगरपालिका वडा नम्बर ३ ओराली बजारमा प्रदर्शन गर्दै चक्काजाम गर्नुका साथै नाराबाजी गरिरहेका छन ।
त्यस्तै मधुवन नगरपालिकाका नगरप्रमुख तेज बहादुर भाटको अध्यक्षतामा सर्वदलीय बैठक बसेको थियो । प्रमुख जिल्ला अधिकारी बन्धु प्रसाद बास्तोला, सुरक्षा अधीकारीहरु तथा दलका नेताहरुको सहभागिता रहेको बैठकले १८ वर्षीया नवीना थारुको मृत्यु भएको घटनामा प्रहरी प्रशासनको गम्भीर लापरवाही भएको निष्कर्ष निकालेको मधुवन नगरपालिकाका नगर प्रमुख तेज बहादुर भाटले जानकारी दिनुभयो ।
त्यस्तै उक्त बैठकले बाघको आक्रमणबाट घाइते हुनुभएकी अस्मिता चौधरी र सोमबारको झडपमा गोली लागी घाइते हुनुभएका राकेश चौधरीको उपचारको सम्पूर्ण खर्च सरकारले बेहोर्ने निर्णय गरेको नगर प्रमुख भाटले बताउनुभयो ।
त्यस्तै जंगली जनावरबाट प्रभावित क्षेत्रमा मेस वायर जाली लगाउने, मृतकका परिवारलाई क्षतिपूर्ति दिने निर्णय भएको नगर प्रमुख भाटले बताउनुभयो
मधुवन नगरपालिकाका वडा नम्बर -३ का वडा अध्यक्ष नारायण मल्लले घटनाका दोषीलाई कारबाही गर्ने निर्णय भएको बताउनुभयो । उहाँले सर्वदलीय बैठकले घटनाको निस्पक्ष छानबिनको लागि केन्द्र सरकारलाई आग्रह गर्ने निर्णय गरेको बताउनुभयो ।
अहिले ओराली बजार क्षेत्र तनावग्रस्त रहेको छ । प्रदर्शनकारीहरुले गोली चलाउने र चलाउन आदेश दिनेलाई कारबाही गर्नुपर्ने माग राखेका छन । यो पनि बर्दियाको मधुवन गोली काण्ड : नविनाको मृत्यु प्रकरण छानबिन गर्न समिति गठन यो पनि बर्दियाको मधुवनमा किन र कसरी चल्यो गोली ?
